Abatawe muri yombi bane barimo n’umuhungu wa Mukamusangwa, bahise bajya gufungirwa kuri Sitatiyo ya Polisi ya Kigabiro, naho uwo mukuru w’umudugudu aracyashakishwa.

Mu mukwabu wasatse urugo rw’uyu mukuru w’umudugudu, hafashwe litiro 66 za Kanyanga, ingunguru eshatu, imifuka ibiri y’isukari irimo ibilo 100 ndetse n’ibindi bikoresho bitandukanye byifashishwa mu guteka Kanyanga.

Urwo ruganda ngo rwari mu rutoki hafi y’ikiraro cy’amatungo kiri munsi y’urugo rwe. Aho ngo ni ho batekeraga kanyanga, iyo bamaze kuminina akajya kuyibika iwe mu rugo, abandi bagasigara bacaniriye ikiri mu ngunguru.

Umuvugizi wa Polisi y’Igihugu mu Ntara y’Iburasirazuba, IP Emmanuel Kayigi, yavuze ko bidakwiriye ko umuyobozi uba ukwiriye kubuza abaturage gukora ibyaha aba ari we ubikora.

IP Kayigi akaba yasabye abaturage muri rusange kutajya bahishira abakora ibyaha kabone nubwo baba ari abayobozi ngo kuko ubuyobozi si bwo buba bwabatumye gukora ayo makosa.

IP Kayigi kandi yasabye abaturage baba bazi Mukamusangwa ko uwamubona yabimenyesha inzego zishinzwe umutekano kugira ngo atabwe muri yombi, anakurikiranwe ku cyaha kijyanye n’ikoreshwa ry’ibiyobyabwenge.

Umukwabu nk’uyu kandi wakozwe mu Mudugudu wa Bicaca mu Kagari ka Karenge mu Murenge wa Karenge, aho umugore w’imyaka 30 yafatanywe litiro101 za Kanyanga ndetse n’ibindi bikoresho byifashishwa mu kuyiteka; na we akaba yahise atabwa muri yombi ajyanwa gufungirwa kuri Sitasiyo ya Polisi ya Karenge.

Ingingo ya 594 y’igitabo cy’amategeko ahana y’u Rwanda iteganya igifungo kiva ku mwaka umwe kugeza kuri itatu ndetse n’ihazabu iva ku bihumbi 50 kugeza ku bihumbi 500 by’amafaranga y’u Rwanda, ku wahamwe n’icyaha kijyanye n’ikoreshwa ry’ibiyobyabwenge.

Emmanuel Ntivuguruzwa