Ndahayo yatawe muri yombi kuwa mbere tariki 21/05/2012 ubwo abaturanyi be batangaga amakuru kuri polisi ko bamubonye yikoreye kanyanga; nk’uko bitangazwa na Polisi y’igihugu. Ndahayo yahise afatwa acumbikirwa kuri Sitasiyo ya Polisi ya Nyamagana mu karere ka Ruhango.

Umuvugizi wa Polisi, Supt. Theos Badege avuga ko Polisi itazihanganira abantu bose bishora mu bucuruzi no gukoresha inzoga zitemewe n’ibindi biyobyabwenge.

Ati “Kunywa kanyanga n’ibindi biyobyabwenge birabujijwe kuko bigira ingaruka ku buzima kandi bigatuma abantu bakora ibyaha birimo gukubita no gukomeretsa, gufata ku ngufu n’ibindi.”

Supt. Badege yashimiye ubufatanye bw’abaturage n’inzego z’umutekano, aho abaturage batanga amakuru atuma inzego z’umutekano zikoma mu nkokora abanyabyaha bagatabwa muri yombi.

Polisi ihamagarira abantu bose kwirinda inzoga zitemewe n’ibindi biyobyabwenge kugira ngo bitabagiraho ingaruka ndetse no kuy muryango nyarwanda.

Nshimiyimana Leonard