Gusakirana byabereye imbere y’ibiro by’akagari ka Rugenge, umurenge wa Muhima mu karere ka Nyarugenge kuri uyu wa gatanu tariki 21/2/2014; mu mihanda mishya izamuka iva kuri ‘Poids Lourd’ (hafi yo kwa Rasta), igahinguka ahitwa kuri Peage.

Murwanashyaka yafashwe nyuma yo kurenga umuhanda agasekura umukingo, imodoka yari yatiye ikaba yahise yangirika bikomeye; muramu we (umukobwa) yari atwaye, we yari amaze kuva mu modoka igenda kubera gutinya mukuru we wari ubakurikiye. Yahise akomereka bikomeye ajyanwa kwa muganga.

Umugore wa Murwanashyaka wari uvudukanye umugabo we kugira ngo adasambana na murumuna we (nk’uko ari yo mpamvu avuga ko yari abakurikiye), yanze kwivuga amazina no kugira ikindi abwira itangazamakuru, ndetse n’amazina y’uwo muramu we nta ruhande na rumwe rwashatse ko atangazwa.

Ibyahwihwiswaga n’abaturage babazi, ni uko ngo uwo mukobwa yari asanzwe arerewe kwa Murwanashyaka, ndetse ko bari baranabyaranye umwana, anatwite inda ye ya kabiri. Umukobwa bivugwa ko asanzwe yiga ku ishuri rya JOC mu mujyi wa Kigali.

Igiteza urujijo ngo ni uko umukobwa ari we wandikiye mukuru we ubutumwa kuri telephone (nk’uko umugore wa Murwanashyaka yabibwiye abantu), amumenyesha ko bageze kuri Motel yitwa Step Town; aho umugore wa Murwanashyaka yahise ahururana imodoka, abagezeho batangira kwirukankana insigane.

Nyir’imodoka yagongeshejwe umukingo, yarahiye avuga ko umugore wa Murwanashyaka agomba kumukoreshereza imodoka; ikaba yanagonze icyapa ku muhanda, mbere yo gusekura umukingo.
Abaturage bahuruye bagendaga bavuga ko bahakuye isomo ryo kwanga guca inyuma abo bashakanye.

Simon Kamuzinzi