Umucungamari wa RIM ishami rya Rubavu avuga ko abajura baje kwiba baciye inzugi n’amadirishya ariho banyuzemo kugera bagere muri banki bashobora kwica umutamenwa wari ubitse amafaranga menshi yarimo y’ibiceri.

Munyaneza Tharicisse usanzwe urinda kuri RIM avuga ko abajura bane bamugezeho mu masaha ya saa sita n’iminota 20 bagahita bamugwa gitumo bakamuboha bakamushyira ibitambaro mu kanwa ngo adatabaza.

Avuga ko bamufatiyeho umuhoro kugeza abajura bamaze kwiba bakagenda maze akabasha gutabarwa n’abandi bazamu, uretse igiceri cya 20 bataye ngo ibindi biceri babitwaye kuko aribyo bari basanze muri banki.

Umucungamari wa RIM, Twizeyimana Jean Nepo avuga ko amafaranga yibwe yari ibiceri byari byasigaye nyuma y’uko ayandi ajyanywe kuri banki. Ibigo by’imari iciriritse ntibyemerewe kuraza muri ibyo bigo amafaranga arenga miliyoni 10.

Umuvugizi wa Polisi mu ntara y’Uburengerazuba, Superintendent Emmanuel Hitayezu, avuga ko polisi ikomeje iperereza mu gushaka abagize uruhare muri ibi byaha by’ubujura, cyakora avuga ko ibigo by’imari iciriritse hamwe n’amabanki bakwiye gufata ingamba zo kurinda amafaranga babika.

Zimwe mu nama atanga avuga ko banyiri ibigo n’amabanki bakwiye kujya barindisha ibigo bifite uburambe mu kurinda bifite ibikoresho kuburyo bashobora guhangana n’abajura, kandi ngo uburinzi bwa banki n’ikigo kibika amafaranga ntibukwiye gukorwa n’umuntu umwe.

Nubwo polisi ikomeje akazi ko gushaka abibye RIM ishami rya Gisenyi, ubuyobozi bwa RIM bwo buvuga ko bufite icyizere ko abibye bashobora gufatwa, ndetse ngo n’amafaranga yibwe azagaruzwa kuko RIM isanzwe ifite ubwishingizi.

Twizeyimana Jean Nepo usanzwe ari umucungamutungo wa RIM ishami rya Gisenyi avuga ko uretse gusana ibyangijwe n’abajura birimo guca inzugi n’amadirishya hamwe n’umutamenwa ngo bagiye kubisana bagakomeza akazi ko kwakira ababagana.

Sylidio Sebuharara