Munyemana Eliphase yari yahawe akazi ko gucukura umusingi w’urusengero rwa EAR n’uko ubwo yari mu muferege urukuta rwarindimutse rumwitura hejuru ahita apfa ataragezwa kwa muganga; nk’uko bamwe mu bari bahari babivuga.

Ikigo nderabuzima cya Hanika cyari hafi aho nicyo yabanje kujyanwamo mu gihe hari hagitegerejwe imodoka y’imbangukiragutabara ngo imujyanye mu bitaro by’akarere ka Nyanza ariko yahageze umwuka warangije kumuvamo.

Umwe mu bari aho agira ati: “Nta butabazi bw’ibanze yigeze akorerwa kuko urukuta rukimara kumwitura hejuru yahise apfa ndetse n’ijisho rye bamuvanye mu musingi ryanogotsemo”.

Nta ruhusa rwo kuvugurura urwo rusengero rwari rwatanzwe

Kabayiza Louis umuyobozi w’urusengero rwa EAR Hanika yahise ajyanwa kuba acumbikiwe kuri station ya Polisi ya Busasamana iri mu karere ka Nyanza kuko nta ruhushya rwo kuvugurura urwo rusengero rwatanzwe nk’uko amakuru aturuka hagati mu buyobozi bw’urwo rusengero abihamya.

Rutikanga Sixbert umukozi w’umurenge wa Busasamana ushinzwe irangamimerere n’ibibazo by’abaturage yemeje ko Pasiteri w’urusengero rwa EAR Hanika afunzwe. Yabivuze atya: “Pasiteri w’urusengero rwa EAR Hanika afungiye kuba yarihaye uruhushya rwo kuvugurura urusengero nta burenganzira yabiherewe rutangwa n’ubuyobozi”.

Icyakora yakomeje avuga ko urusengero rwa EAR Hanika rwari rwasabye uruhushya rwo kuvugurura inyubako yabo ariko dosiye ikaba yari ikiri mu buyobozi batarasubizwa ngo ubwo burenganzira babwemerewe.

Munyemana Eliphase wapfuye agwiriwe n’urukuta rw’urusengero rwa EAR Hanika ni mwene Mugemana Gervais akaba yaravukiye mu murenge wa Kamegeri mu karere ka Nyamagabe mu Ntara y’Amajyepfo.

Jean Pierre Twizeyeyezu