Henshi mu duce dutandukanye tw’Umujyi wa Nyanza twabereyemo ubwo bujura abaturage baho bibwe bari baje kureba ko ibikoresho byabo biri mu byo polisi yashyikiririje bene byo kugira ngo babisubirane, bamwe bagira amahirwe yo kubibona abandi bataha amara masa.

Abasubijwe ibi bikoresho bari babanje kuregera polisi ndetse banayigaragariza ibimenyetso by’ibintu byibwe kugira ngo hatagira abiyitirira iby’abandi bakabitwara.

Nakure Shadia umwe mu basubijwe ibikoresho bye byo mu rugo yari amaze icyumweru yibwe yabwiye Kigali Today ko ari ibyishimo bidasanzwe kuba ibikoresho byo mu rugo yibwe yongeye kubica iryera.

Yabivuze atya: “Nishimiye akazi kanoze polisi yakoze ko kubasha guta muri yombi abajura bari baduteye mu ngo ndetse n’ibikoresho byacu tukaba tubisubijwe”.

Polisi y’igihugu ikorera mu Karere ka Nyanza ivuga ko nyuma yo kwakira ibirego by’abaturage yakoze uko ishoboye kugira ngo abihishe inyuma y’ubwo bujura bafatwe. Abari bibye ibintu binyuranye bafashwe ngo ni nabo bahise bagaragaza abo babigurishijeho ndetse n’aho ibyo byibano byari bihishe.

Abakurikiranyweho ubujura bw’ibyo bikoresho byo mu ngo kimwe nabo babigurishijeho bose bacumbikiwe kuri Sitasiyo ya Polisi ya Busasamana bashinjwa icyaha cy’ubujura buciye icyuho.

Polisi y’igihugu ikorera mu Karere ka Nyanza yari imaze iminsi mike imurikiye abaturage abantu ikurikiranyeho ubujura n’ibyitso byabo ndetse n’ibikoresho bafatanywe.

Jean Pierre Twizeyeyezu