Uyu mukwabo wakozwe tariki 18/11/2013 wibanze ahanini kuguta muri yombi indaya n’inzererezi zabonekaga mu mujyi rwagati wa Nyanza n’inkengero zawo.

Bamwe mu baturage babonye uwo mukwabo ukorwa na polisi bishimiye ko wataye muri yombi indaya n’inzererezi zizwiho ingeso yo kwiba udukapu tw’abagore ndetse no kwambura abantu telefoni zigendanwa zimwe z’agaciro zo mu bwoko bwa Samsung Galaxy S4 nyuma yaho zadukiye mu mujyi wa Nyanza.

Mu kubata muri yombi byagaragazaga ko byakorewe inyigo ihambaye yo kumenya aho indaya n’inzererezi zikunze kuba ziri mu masaha yo ku manywa zitegereje ko bwira ngo zitangire zicuze abantu ibyabo.

Abafatiwe muri uyu mukwabo bagera kuri 30 kandi nabo ubwabo biyemereraga ko nta murimo uzwi wari ubatunze ngo usibye gushakisha mu buryo bunyuranye icyababeshaho harimo no kwiba abarangaye nk’uko benshi muri bo babyigambye nyuma yo gutabwa muri yombi.

Twavuganye n’umupolisi ushinzwe ubufatanye bwa Polisi n’abaturage mu gucunga umutekano (Community Policing) mu karere ka Nyanza wari ukuriye uwo mukwabo atangaza ko abatawe muri yombi biganjemo indaya n’inzererezi.

Ati “Impamvu twabafashe ni uko akenshi wasangaga aribo bari inyuma y’ubujura, urugomo, kunywa no gukwirakwiza ibiyobyabwenge”.

Umunyamakuru wa Kigali Today yashatse kumenya aho abafashwe bari bujyanwe asubizwa ko ari mu Kigo indaya n’inzererezi zo mu karere ka Nyanza zashyiriweho kugira ngo zigirwe inama yo kureka iyo myifatire idakwiye urubyiruko dore ko abenshi muri bo bari bakiri bato mu myaka.

Nk’uko uyu mupolisi yakomeje abisobanura ngo icyo kigo cyubatse mu murenge wa Mukingo ndetse hateguwe n’uburyo abafashwe muri ubwo buryo bazajya bagirwamo inama binyuze mu biganiro binyuranye byabagenewe.

Yagize ati: “Polisi y’igihugu ndetse n’ubuyobozi bwite bw’akarere ka Nyanza bazajya babagezaho ibiganiro ndetse banigishwe guhitamo imyuga myiza yazabagirira akamaro kuruta kwishora mu buraya n’ubuzererezi banywa ibiyobyabwenge bidafite icyo byabungura mu mibereho yabo ya buri munsi”.

Bamwe mu bafatiwe muri uyu mukwabo bavuga ko baramutse bigishijwe imyuga itandukanye n’uburaya n’ibuzererezi bari bamazemo igihe babyishimira ngo kuko n’ubusanzwe babikoraga babuze ayandi mahitamo.

Jean Pierre Twizeyeyezu