Nk’uko Nsanande abyivugira ngo yagiranye amakimbirane n’umugore we bituma batangira kurwana induru ziravuga ku musozi abantu barahurura ndetse n’umukobwa we ufite imyaka 22 aza aje gukiza ababyeyi be barimo kurwana, ngo ibi byatumye umugore we abasha kumwigobotora ariruka aramucika.

Nyuma yo kubona ko umugore barwanaga amucitse bitewe n’uwo mukobwa wabashije kubakiza, Nsanande yagize umujinya afata uwo mukobwa we amuruma umukondo awukuraho, ntiyagarukira aho yinjira mu nzu afata ihene z’uwo mwana we eshatu arazica indi imwe arayivunagura.

Uyu mwana w’umukobwa yahise ajyanwa ku bitaro bya kibogora amarayo iminsi itatu baramuvura arataha.

Nsanande Athanase asaba imbabazi akavuga ko aramutse ababariwe atazongera gukora ibyo yakoze ndetse akavuga ko yifuza kubona umuryango we ngo awusabe imbabazi kubera igikorwa kigayitse yakoze.

Agira ati “ndasaba imbabazi abantu bose cyane cyane Imana kuko ibyo nakoze nabikoreshejwe n’umujinya, ndamutse mbabariwe sinazongera gukora ibyo nakoze ukundi”.

Nsanande aragezwa imbere y’ubutabera kuri uyu wa mbere w’icyumweru gitaha. Aramutse ahamwe n’icyaha cyo kwica amatungo no kugira umujinya ushobora kuviramo urupfu rw’abantu yahanishwa igifungo kiri hagati y’amezi 6 n’umwaka umwe, cyangwa agacibwa ihazabu y’amafaranga hagati y’ibihumbi 200 na miriyoni ebyiri.

Jean Claude Umugwaneza