Bizimungu Innocent atuye mu mujye wa Nyamagabe; avuga ko mu byabashimishije cyane harimo kuba inkeragutabara zaraciye insore sore zo muri gare ya Nyamagabe aho umuntu yajyaga gutega imodoka ugasanga barajijisha abagenzi. Ati “ubu umuntu arajyenda agafata imodoka k’umutuzo”.

Nubwo abaturage bishimira ibikorwa by’izi nkeragutabara, zo zivuga ko zigifite imbogamizi nyinshi mu kazi bakora cyane cyane kutagenerwa umushahara.

Ndikuryayo Emmanuel ni umuyobozi w’inkeragutabara mu karere ka Nyamagabe.
Avuga ko kugeza ubu inkeragutabara zitungwa n’udufaranga tuba twakusanyijwe mu baturage twi ntica ntikize. Asanga haramutse hagiyeho agashahara ka buri kwezi zatanga umusaruro uruta uwo zitanga.

Ati “ndaguha urugero, ziherutse gufata moto yari yibwe isubizwa nyirayo, ziherutse guta muri yombi abagizi banabi bateze abantu bavaga gusenga, n’ibindi”.

Mu karere ka Nyamagabe habarurwa inkeragutabara zisaga 700, zatangiye kwibumbira mu ma koperative kugira ngo zirebe uko zakwiteza imbere.

Eric Muvara