Icyumweru cyatangiye tariki 18/11/2012, kikazarangirana n’iki cyumweru tariki 24/11/2012, cyaranzwe n’ibikorwa byo gukangurira abaturage cyane abaturiye umuhanda, uburyo bakoresha umuhanda igihe bagiye kwambuka.

Umuvugizi wa polisi mu ntara y’Amajyaruguru, supt Francis Gahima, agira ati: “Twagize umunsi wo kuganiriza abamotali, tuganira n’abaturage bo mu Byangabo ku bijyanye no gukoresha imihanda yambukiranya umuhanda, gusobanura ibijyanye n’umuvuduko n’ibindi”.

Bamwe mu baganirijwe muri iki cyumweru, bavuga ko babashije kwiga byinshi, bizabafasha gukoresha umuhanda, aho beretswe ko bafite uburenganzira bwo gutanga amakuru, kuri buri wese waba uri gukora amakosa mu muhanda.

Olivier Irankunda, utuye mu kagali ka Gisesero, umurenge wa Busogo, umunyeshuri mu mwaka wa kane w’ashuri abanza, yagize ati: “Ubu mbonye umushoferi untwaye yasinze, nshobora guhita umenyesha Polisi mbonye hafi, kugirango ataza kudugusha”.

Jean Jacques Karambizi, utuye mu murenge wa Busogo mu karere ka Musanze, yagaragaje ko abaturage batuye muri santere ya Byangabo bahangayikishijwe n’uburyo imodoka zihanyura zihuta kubera ko harambuye, bagasaba ko hashyirwaho ingamba zo gukemura icyo kibazo.

Insanganyamatsiko y’iki cyumweru aragira iti: “Imihanda irimo umutekano mu guteza imbere amajyambere arambye ya Afurika”.

Jean Noel Mugabo