Nk’uko bitengazwa n’umunyamabanga nshingwabikorwa w’umurenge wa Busogo, Iyamuremye Jean Damascene, impanuka yabaye mu gihe cya saa cyenda ubwo bamwe mu bari basanzwe bakora ubucukuzi bw’amabuye y’agaciro bahagaritswe bagiye kuyacukura k’uburyo butemewe n’amategeko.

Abantu babiri bahise bitaba Imana naho umwe avanwamo agihumeka ahita ajyanwa ku kigo nderabuzima cya Busogo aho ari kwitabwaho. Ibirombe baguyemo byari bisanzwe bicukurwamo na Koperative MINECA yahagaritswe kubera gucukura k’uburyo butajyanye n’igihe ariko abaturage bahafite imirima bakomeje gucukura rwihishwa. Ibi byago byahuriranye n’uko imvura irimo kugwa ari nyinshi kandi ubutaka bakaba bwinjirwa n’amazi.

Iyamuremye atangaza ko abaguweho n’ikirombe bari nko mu bujyakuzimu bwa metero 20. Ngo hakenewe ubufasha mu gukora ubutabazi kuko ahabereye impanuka nta muhanda uhari. Barakoresha amaboko y’abaturage kandi nta cyizere ko abakiri mu kuzimu bakiri bazima.

Sylidio Sebuharara