Mu magambo ye yagize ati “N’ubundi imodoka nizishaka zinyure hejuru nta bundi buzima ntegereje. Bagenzi banjye ubu bageze kure nanjye ndirirwa nicwa n’inzara. Nimushaka izo modoka muzinyuze hejuru yanjye”.

Uwo musore utabashije kumenyekana yavugaga ko ashaka amafaranga kuko bagenzi be bamaze gutera imbere we akaba akiri kwicwa n’inzara.

Abantu twaganiriye bavuze ko batazi amazina y’uwo musore, ndetse na we ubwe ntiyabashije kwivuga amazina ye kuko yasaga n’uwanyoye ibiyobyabwenge.

Gusa hari abavuga ko ashobora kuba ari umusazi cyangwa afite ibibazo by’ihungabana kuko basanzwe bamubona mu bikorwa nk’iby’abantu bafite ibibazo byo mu mutwe, nk’uko uwitwa Kaneza Sudi yabidutangarije.

Hari abandi bavuga ko uwo musore ashobora kuba yarigeze kuba umusirikari akaza guhungabanywa n’ibyo yaboneye ku rugamba, dore ko na we yerekanaga inkovu ku ijosi akavuga ko yarashwe ariko ntapfe, ari na yo mpamvu ngo ashaka icyamwica nk’uko yabivugaga.

Abashinzwe umutekano wa gare babashije kumuvana mu marembo ya gare aho yari yaryamye bamushyira ku ruhande imodoka zibona gukomeza gusohoka. Yashatse gukomeza kwigaragambya bamubwira ko bamufatira ibyemezo bikarishye ntiyongera guteza akavuyo muri gare.

Cyprien M. Ngendahimana