Uwo mubyeyi uba mu nkambi y’impunzi z’Abanyekongo ya Kiziba iri mu murenge wa Rwankuba mu karere ka Karongi avuga ko icyo gihano kihanukiriye yagitewe n’uko umwana yari amaze kumutesha umutwe kubera ko yanze ishuli akigira rubebe.

Murorunkwere yagize ati: “Yabanje kuva mu ishuli yigira ikirara, akajya yiba ibintu byo mu rugo, nyuma aza no gutangira kwiba abaturanyi.

Ubushize yibye baffre (insakazamajwi), turayimwambura tuyisubiza ba nyirayo, kuwa mbere ni bwo yagiye mu isoko ashikuza umukecuru agafuka kari karimo 2000FRW, baje kundegera numva mbuze icyo nkora maze ndamutwika”.

Murorunkwere Muhoza yitwikiye umwana ngo abitewe n’umujinya.

Nubwo uwo mwana w’umuhungu w’imyaka 11 yababaraga cyane, yihanganye avuga uko byamugendekeye. Ngo nyina yaramufashe kuwa mbere ni mugoroba, amujyana ahantu hitwa muri Nyaruyaga arabanza aramukubita, arangije afata ishashi ayitwikisha buji ubundi ayimutonyangiriza mu kiganza.

Umwana yavuze ko nakira atazasubira kwa nyina, ngo azigira kwa nyirasenge.

Umuyobozi w’umudugudu babamo mu nkambi, witwa Serumveri Rubanza bakunze kwita Brakof, yatangarije Kigali Today ko nyina w’uriya mwana yapfakaye afite umwana umwe, ariko ashaka undi mugabo wo kumuba hafi batarasezeranye.

Serumveri rero ni we wahise ajyana umwana kwa muganga amugumaho kuko uwo mwana nta wundi muntu afite umwitaho nyina afunze.

Uwitwa Gipanga Augustin umukozi wa AVSI, ushinzwe gukurikirana imanza z’abana bo mu nkambi batagejeje ku myaka 18, ni we wataye muri yombi Murorunkwere, amushyikiriza Polisi yo mu karere ka Karongi.

Yacanye buji ayimujojobereza mu kiganza.

Umuyobozi wa Polisi mu karere ka Karongi Chef Superintendent Gatambira Paul, avuga ko uriya mubyeyi ashinjwa icyaha cy’iyicarubozo (torture), gihanishwa igifungo cy’amezi atandatu kugeza ku myaka ibili.

Ariko ngo iyo iryo yicarubozo rivuyemo ubumuga butuma nyirabwo ntacyo abasha kwikorera, uwarikoze ahanishwa igifungo kiri hagati y’imyaka itanu n’irindwi.

Gasana Marcellin