Amakuru y’itabwa ry’uyu mwana yamenyekanye mu gitondo cyo ku wa 27 Ukwakira 2015, ubwo umuturanyi ucumbikiwe n’uyu mugore yatabaje abandi ababwira ko Munderere ashobora kuba yarabyaye agata umwana mu musarane; dore ko bari basanzwe bakeka ko atwite.

Yabyaye umwana amuta mu musarane.

Abaturanyi bahamagaje ubuyobozi maze bubafasha gutindura umusarani maze bakuramo akana kapfuye. Munderere wari wagiye guhinga yemeye ko umwana ari uwe yabyaye tariki 20 Ukwakira 2015, akavuga ko yamubyaye yapfuye kandi yamwibyaje wenyine nta n’undi muntu wabimenye mu bo babana.

Uyu mugore w’imyaka 34 y’amavuko, avuga ko awo mwana yajugunye ari imbyaro ye ya kane. Ngo yamutwise abihisha abantu bose ku buryo n’ababimubazaga yabahakaniraga. Ati "Nangaga kubyemera kugira ngo nkure urubwa ku musore duturanye babeshyeraga ko ari we wayinteye".

Umunyamabanga Nshigwabikorwa w’Akagari ka Gihira, Rudahunga Jean Marie Vianney, aragaya ubunyamaswa uyu mugore yagaragaje abyara umwana akamujugunya kandi yari afite amikoro yo kumurera kuko ngo nubwo yapfakaye muri 2013, umugabo we yamusigiye imitungo ihagije.

Ati "Umugabo we yari pasiteri kandi ari n’umwarimu mu mitungo yamusigiye harimo amazu akodesha, afité n’inka kandi afata n’amafaranga ya pansiyo y’umugabo. Ntiyagombaga no gutinya kubyara kuko uwo yari umwana wa kabiri yari agiye kubyara nyuma y’uko umugabo apfuye".

Munyemana Martin, umuvandimwe w’umugabo w’uyu mugore atangaza ko nubwo umuvandimwe wabo yapfuye uyu mugore nta makimbirane yagiranaga n’umuryango yashatsemo kuko bari baramugabanyije imitungo n’abandi bana bakuru b’umugabo we kuri ubu bibera mu mahanga.

Ati "Abana babonye atangiye kubyara ku ruhande bansaba kubagabanya. Acunga ahe, naho ah’abo bana hacungwa na nyirasenge".

Nyuma y’uko ubuyobozi bufatanyije n’umuryango bashyinguye akana, Munderere ari mu Bitaro bya Rukoma kugira ngo asuzumwe ko adafite ibibazo by’ubuzima, ubundi akurikiranywe n’ubutabera kwihekura.

Marie Josée Uwiringira