Kubera ko amakuru yanditse ku ndangamuntu atagaragaza neza umwirondoro w’umuntu, ubuyobozi bugiye kubakorera icyangombwa cyihariye kigaragaraho umwirondoro wuzuye wa bo, kugira ngo baramutse bagize cyangwa bateje ikibazo ubuyobozi bubone aho bubabariza.

Icyo cyemezo cyashimishije abacumbitsi, kuko ngo n’ubwo bari batuye mu murenge batibonaga nk’abaturage ba ho, ndetse rimwe na rimwe abo bakoreye bakabambura cyangwa bakabarenganya. Ubwo rero ngo nibamara kubarurwa bakagira n’icyangombwa kibemerera kuba mu murenge, bazabona aho bahera bajya gusaba kurenganurwa.

Ababacumbikira na bo bashimishijwe n’iyandikwa ry’abacumbitsi bakamenywa n’ubuyobozi, kuko hari ubwo bateza ikibazo, umucumbikiye akabura aho abariza.

Urugero ni umukecuru witwa Kabanyana wo mu Kagari ka Muganza, wacumbikiye umuryango waturutse i Nyabikenke; umugabo n’umugore bakajya bashyamirana, nyuma bakaza guta abana ba bo bane muri urwo rugo kuri ubu uwo mukecuru akaba ari we ubarera kuko atazi aho yakura ababyeyi ba bo.

Abenshi mu baza gutura mu murenge wa Runda, bazanywa no gupagasa bashaka ibiraka mu mirimo y’ubwubatsi.

Mu nama yahuje abayobozi n’abaturage bagera kuri 200 bacumbitse mu murenge wa Runda, kuri uyu wa gatatu tariki 05/12/2012, inzego z’umutekano zikorera mu murenge wa Runda zibukije aba bacumbitsi, ko bagomba kugira uruhare mu kubungabunga umutekano w’igihugu nk’abandi Banyarwanda.

Babasabye kumenyana no gutanga amakuru ku buyobozi mu gihe babonye umuntu udasanzwe, ndetse n’igihe hari umuturanyi ugize ikibazo cy’umutekano muke bakihutira gutabara.

Ubuyobozi bwasabye aba bacumbitsi kwitabira gahunda za Leta nk’umuganda, inama n’ubwisungane mu kwivuza. Basabwe kandi kwirinda ubushoreke, kuko usanga bamwe muri bo basiga abagore aho bakomoka bakaza kwinjira abandi mu rupagasirizo, bityo ibyo baje guhaha ntibabigeze mu ngo za bo.

Marie Josee Uwiringira