Ubwo Minisitiri Kaboneka yatangiza ukwezi kw’imiyoborere myiza mu Murenge wa Cyumba wo mu Karere ka Gicumbi tariki ya 18 Werurwe 2015, nyuma yo kuganira n’abaturage yanakiriye ibibazo byabo kugira ngo bikemurwe maze Naruhoza aba uwa mbere mu kubaza ikibazo.

Uyu mugabo ariko ntiyaje guhirwa n’ikinyoma cyo kubeshyera abayobozi ko bamufungishije kubera kurwanya ubucuruzi butemewe bwambukiranya imipaka y’u Rwanda na Uganda, kuko abaturage bahise bamunyomoza ndetse baboneraho kumuregera Minisitiri Kaboneka uburyo yabajujubije yiyita ko ashinzwe gutanga amakuru ku nzego z’ubuyobozi kugira ngo abambure ibintu byabo akoresheje ubwo buriganya.

Minisitiri Kaboneka yasabye umuyobozi w’Akagari ka Rwankonjo, Basigayabo Marcelline kwisobanura impamvu ahohotera umuturage utanga amakuru maze umuyobozi agaragaza uburyo uyu mugabo ako kazi ari ako yari yarihaye ndetse bigatuma ahohotera abaturage anabambura utwabo yiyitirira inzego z’umutekano.

Muhizi Jean Baptiste we avuga ko uyu mugabo yategaga abantu bavuye kwihahira mu gihugu cya Uganda akabambura utwabo, agatanga urugero ko ubwo yari avuye kuzana ifu y’ubugari yayimwambuye kuko yabuze amafaranga yo kuyigombora.

Uwitwa Twagira Alexandre nawe yamushinje uburyo yategeye mu nzira umugore we wari uvuye kugura matora mu rwego rwo kubahiriza gahunda yo guca nyakatsi ku buriri, maze uyu Naruhoza ahita amubwira ko natamuha amafaranga iyo matora ayisubiza muri Uganda, iby’amahirwe umugabo we ahita ahagoboka maze amuha inoti y’igihumbi abona kubaha matora yabo.

Uwitwa Habyarimana Jean Louis we yavuze ko yamwiboneraga ateze imodoka zikora ubucuruzi maze umuhaye amafaranga wese akamurekura, ariko uyamwimye akamutwarira ibintu.

Ni nawe waje kubigeza ku buyobozi bw’Inama Njyanama y’Umurenge wa Cyumba kugira ngo bige ku kibazo cye kuko yari yarajujubije abantu.

Nyuma y’amakosa yagaragajwe n’abaturage, Naruhoza yahise atabwa muri yombi kugira ngo akurikiranwe n’inzego z’ubutabera.

Ernestine Musanabera