Umunyamabanga Nshingwabikorwa w’Umurenge wa Nyankenke byabereyemo, Abahe Fred, avuga ko uyu mutwe w’ “Abarembetsi” wari wagiye muri Uganda kuzana kanyanga tariki ya 13Kamena 2015 maze umwe muri bagenzi babo witwa Karamage bakunze kwita Kibonge wari waritandukanyije na bo abatangaho amakuru ko binjije Kanyanga.

Amategura y’inzu barayamenaguye.

Abo barembetsi babamaze kumenya ko ari Karamage wabatanzeho amakuru ngo bahise bajya iwe mu rugo kumushaka ngo bamwice baramubura ni bwo badukiriye inzu ye barayisenya.

Ntabwo bamenaguye amategura gusa ahubwo binjiye no mu nzu bafata ameza n’intebe barabitemagura byose birangirika.

Ubuyobozi bw’Umurenge hamwe na Polisi ikorera mu Karere ka Gicumbi bahise batangira gushakisha aba barembetsi kugira ngo batabwe muri yombi maze bafata umwe witwa Mashakarugo Geremie wari wihishe mu gishanga cy’Urugezi.

Amadirishya y’inzu bayangije.

Nyuma ku bufatanye n’abaturage Polisi ikorera mu Karere ka Gicumbi yakomeje gushakisha abangije inzu ya Karamage ubu hakaba hamaze gutabwa muri yombi 4.

Ikibazo cy’abarembetsi kimaze imyaka myinshi mu turere tugize Intara y’Amajyaruguru ariko gisa n’ikimaze kurenga abaturage kuko usanga baramaze kurema umutwe ukomeye ndetse witwaza intwaro gakondo.

Intebe na zo binjiye mu nzu bazigira ubushwange.

Zimwe mu ntwaro gakondo bitwaza zirimo amahiri, imipanga, ibisongo n’izindi ntwaro bifashisha barwanya uwo ari we wese bahuye na we agashaka kubatesha ibyo biyobyabwenge.

Ernestine Musanabera