Iki cyaha Nyirabucyangenda wo mu Mudugudu wa Bugarama, Akagari ka Nyangara, Umurenge wa Gatunda wo mu Karere ka Nyagatare akekwaho yagikoze ku mugoroba wo ku wa 11/02/2015.

Intandaro y’uru rugomo ngo ni amakimbirane ashingiye ku mitungo. Nyuma yo kweza imyaka, umugabo we Kwatiromunda Simon yajyaga kuyigurisha amafaranga akuyemo akayanywera ntibishimishe umugore.

Uretse aya makimbirane kandi ngo aba bombi bari banasomye ku nzoga, maze batangiye gutongana umugore ahita afata isuka atema ku gitsi cy’ukuguru n’ukuboko.

Nyirabucyangenda yatawe muri yombi akurikiranyweho gutemesha umugabo we isuka.

Abaturanyi bahise batabaza polisi y’igihugu umugabo ajyanwa kwa muganga.

Umuvugizi wungirije Polisi y’igihugu mu ntara y’iburasirazuba akaba n’umugenzacyaha wungirije, Inspector of Police Emmanuel Kayigi, asaba abaturage guhindura imyumvire mu gihe bafite ibibazo bakabigeza ku buyobozi aho kumva byakemurwa no kurwana.

Ati “Ni byiza ko mu gihe abantu babana ari babiri ko mu gihe bejeje imyaka bajya inama yo gucunga uwo mutungo nta gusahuranwa kubayeho. Gusa iyo babibaye nabwo ntabwo bikwiye gukemurwa no kurwana. Ubuyobozi burahari n’inteko z’abaturage. Aha hose bakagejejeyo ikibazo cyabo kigakemurwa aho kurwana”.

IP Kayigi kandi akomeza asaba abaturage kwirinda kunywa ibiyobyabwenge kuko bituma badatekereza ibyo bagiye gukora n’ingaruka zabyo. Ibi abishingira ku kuba aba bombi bari babanje kunywa inzoga bikekwa ko ari iyo mu mashashi ya Chief waragi cyangwa Kanyanga.

Kuri ubu Kwatiromunda ari mu kigo nderabuzima cya Nyarurema aho avurwa ibikomere ndetse bikaba binashoboka ko yataha vuba, mu gihe umugore we afungiwe kuri sitasiyo ya Polisi ya Gatunda akazagezwa imbere y’ubutabera.

SEBASAZA Gasana Emmanuel