Ubwo yaganiraga na Kigali Today, uhagarariye polisi mu karere ka Gatsibo Spt Tebuka Pierre, yavuze ko ibi biti bifatwa ku bufatanye n’inzego zitandukanye, bikaba bifatwa nk’ibiti bifite agaciro kuko biba bijyanywe mu gihugu cya Uganda kugurishirizwayo.

Tebuka akomeza avuga ko ingamba bafite kugira ngo abantu barekeraho icuruzwa n’itemwa ry’ibi biti, ari ukubifata bigatwika ku buryo n’uwabifata ntaho yazabitwara kuko ntacyo byamumarira, indi ngamba ngo ni ugukomeza gukora ibikorwa (operations) byo gukomeza kubifata bigatwikwa.

Umukozi w’Akarere ka Gatsibo ushinzwe ibidukikije no kubungabunga amashyamba, Mwiseneza Jonas, avuga ko ibi biti biri mu biti bikomwe kuko biri ku rutonde rw’ibiti byagiye bikendera.

Ati: “Kuba habaye igikorwa cyo gutwika ibi biti ni ukugira ngo ababitema babicikeho bumve ko ari ugukomeza kwangiza ibidudukikije”.

Ibiti byatwitswe byanganaga na toni 5 n’ibiro 550, bikaba bifite agaciro ka miliyoni 11 n’ibihumbi 100 by’amafaranga y’u Rwanda. Ikiro kimwe kigurwa amafaranga 2000 byagezwa muri Uganda kikagurishwa amafaranga 5000 y’u Rwanda.

Umuntu ufatiwe mu cyuho atema ibi biti, afatwa nkuri kwangiza ibidukikije, icyaha gihanishwa ingingo ya 416 mu gitabo cy’amategeko ahana ibyaha mu Rwanda, iyi ngingo ikaba ivuga ko ahabwa igifungo kiri hagati y’amezi 6 n’imyaka 2 hamwe n’ihazabu y’amafaranga ibihumbi 300 kugeza kuri miliyoni 2 y’amanyarwanda.

Benjamin Nyandwi