Gacamumakuba yatawe muri yombi na polisi ikorera mu karere ka Gakenke imusangana litiro zigera kuri 70 za kanyanga mu rugo iwe.

Aho afungiye kuri polisi yadutangarije ko amaze hafi umwaka acuruza kanyanga yagemurirwaga n’abasore babiri baturiye akarere ka Burera bamuzaniraga amajerekani abiri yuzuye kanyanga akazabishyura imaze gushira.

Gacamumakuba asobanura ko yatangiye gucuruza kanyanga abirigiwemo inama n’umwe mu bamugemuriraga kanyanga uzwi ku izina rya Celebre wamwumvishije ko nacuruza kanyanga azabona amafaranga menshi kandi ku buryo bworoshye ugereranyije n’ubuhinzi yakoraga.

Kanyanga yayisukaga mu kabido agashyira mu gikapu nk’umugenzi ufite urugendo rwa kure maze akajya ku muhanda kuyigurisha n’abakozi bakoreshwa n’Abashinwa mu muhanda wa Kigali-Musanze.

Uyu mugabo wiyemerera icyaha akanagisabira imbabazi, asaba abandi bantu bacuruza cyangwa banywa kanyanga kubireka kugira ngo batazabiryozwa n’amategeko.

Aramutse ahanwe n’icyaha yahanishwa igihano cy’igifungo kuva ku mezi atatu kugeza ku myaka itanu n’ihazabu y’amafaranga atarenga ibihumbi 250 cyangwa kimwe muri byo ushingiye ku ngingo ya 273 y’amategeko mpanabyaha y’u Rwanda igitabo cya kabiri.

Nshimiyimana Leonard