Iyo mpanuka yabereye ahitwa mu Rwamenyo mu Kagali ka Nyakina, Umurenge wa Gashenyi, Akarere ka Gakenke.

Nk’uko byasobanuwe na Gahunde Donat wari utwaye iyo modoka yari ifite akabazo gato, yavuze ko iyi mpanuka yatewe n’akavura karimo kagwa, kuko yafashe feri, igahita izunga, kugeza ubwo igaramye iruhande rw’umuhanda.

Gahunde abisobanura agira ati: “Ndaje, ubwo kubera ko hari akaguru kamwe katari gufata neza, nkoze kuri ka feri nshatse gukata iri koni, ubwo iba irazunze nshatse kugarura ihita yicurika hano”.

Iyi ambulansi ifite purake IT 276 RC yari itwaye umubyeyi ugiye kubyara witwa Mukagatete Annonciate w’imyaka 45, umurwaza we n’abaforomo babiri, gusa bose babashije kuvamo ari bazima uretse umubyeyi n’umurwaza we bavuga ko babara mu bikanu na bwo ku buryo bworoshye.

Uyu Mukagatete ukomoka mu Kagali ka Rubona, Umurenge wa Nemba mu Karere ka Burera yagize impanuka avuye ku Kigo Nderabuzima cya Nyamugari kubera ikibazo cy’inda yamuguye nabi abaforomo babona bibarenze bafata icyemezo cyo kumwohereza i Nemba.

Amakuru dukesha kwa muganga avuga ko nyuma y’igihe gito ageze ku Bitaro bya Nemba, uyu mubyeyi yaruhutse umwana w’umuhungu utagejeje ku gihe kuko yavukiye amezi 7.5, apima ibiro 2 n’amagarama 500.

Mu Rwamenyo ni hamwe mu hantu hakunda kubera impanuka nyinshi mu Muhanda Kigali- Musanze bitewe ahanini n’imiterere y’inkoni rihari. Mu mpera z’umwaka wa 2012, ikamyo na yo yarenze umuhanda isandaza ifu y’imvange yari ipakiye.

Mu mpera za Nzeri muri uwo mwaka, umunyonzi yitabye Imana n’abandi bantu bane barakomereka bikomeye ubwo igare ryaburaga feri rikagonga icyapa cy’aho mu Rwamenyo.

Mu kwezi kwa Gashyantare, aho mu Rwamenyo ikamyo yo muri Tanzaniya yakoze impanuka ihitana umushoferi na kigingi.

Jean Noel Mugabo na Nshimiyimana Leonard