Ntakirutimana wari umukozi ushinzwe inguzanyo muri Sacco-Umusingi ya Rushashi, ashinjwa kuba yarabikuje amafaranga ibihumbi 230 ku mafishi y’abakiriya mu bihe bitandukanye ndetse anashyira mu mufuka amafaranga ibihumbi 84 umukiriya yishyuye umwenda abereyemo Sacco, nk’uko bitangazwa na Ryarasa Vénuste, umucumumari wa Sacco- Umusingi ya Rushashi.

Ayo manyanga yavumbuwe ubwo umukiriya yazaga kubikuza, bagasanga hari amafaranga yabikujwe ku fishi ye kandi agaragara ko akiri mu gatabo ka Sacco.

Uwo musore wari umaze amezi icyenda mu kazi, yafashe agatabo ka Sacco akandikira umukozi we amubeshya ko yamufungurije konti azajya ahemberwaho.

Yaje kugenda amwandikiramo amafaranga yitwa ko ari umushahara, ubu yarageze ku bihumbi 55 by’amafaranga y’u Rwanda, nk’uko biklmeza bisobanurwa n’umucungamari wa Sacco.

Umucungamari wa Sacco-Umusingi avuga ko nyuma y’ubwo buriganya, bafashe ingamba zo gukora igenzura ry’umutungo w’abakiriya buri munsi akazi karangiye ndetse no gushyiraho umukozi ushinzwe amafishi y’abakiriya.

Nshimiyimana Leonard