Ba Local Defense batatu aribo Mugiraneza Fidele, Ngaruye Emmanuel na Niyonzima Pierre Celestin bakuweho ikizere nyuma yo kurya ruswa umuntu yabahaye kugira ngo bamufashe kwinjira mu gihugu cya Uganda mu buryo bunyuranyije n’amategeko; nk’uko byatangajwe n’umuyobozi w’umurenge wa Cyanika, Nkanika Jean Marie Vianney.

Ruhanika Gaspard ukuriye Local Defense mu murenge wa Cyanika avuga ko bariye iyi ruswa muri Mutarama umwaka wa 2012. Nyuma baje gufatwa barafungwa mu kwezi kwa kabiri uwo mwaka bajyanwa mu rukiko. Urukiko rwaje kubategeka ko basubiza amafaranga bakiriye.

Akomeza avuga ko n’ubwo bategetswe kwishyura ayo mafaranga, bahise babakuraho ikizere kuko batagaragaraje ubunyangamugayo mu kazi kabo.

Izo Local Defense zambuwe impuzankano (uniformes) zabo ndetse n’ibindi bikoresho by’akazi bari bafite nk’uko umunyamabanga nshingwabikorwa w’umurenge wa Cyanika yabyemeje.

Abaturage bavuga ko atari ubwa mbere bahagarika ba Local Defense ariko ugasanga baridegembya bakomeza guhungabanya umutekano.

Nkanika afatanyije n’abashinzwe umutekano muri uwo murenge batangaje ko abantu nk’abo bagiye kubafatira ibyemezo kugira ngo bashyikirizwe inzego zibishinzwe bahanwe.

Norbert Niyizurugero