Ibi aba baturage babisabwe ku wa mbere tariki ya 17/03/2014 mu nama y’umutekano yabereye mu murenge wa Gahunga, igahuza abo baturage n’abayobozi babo ndetse n’inzego zishinzwe umutekano.

Iyi nama y’umutekano yabaye nyuma y’iminsi mike abagabo bane bakekwaho guhungabanya umutekano mu mujyi wa Musanze bahatera ibisasu bya grenade (soma gerenade) batawe muri yombi. Aba bagabo bose batatangajwe amazina kubera iperereza rigikorwa ngo baturuka muri iyo mirenge.

Muri iyo nama yari yitabiriwe n’abaturage babarirwa mu bihumbi, abayobozi b’uturere twa Burera na Musanze bafatanyije n’inzego z’umutekano, bagaragarije abo baturage amakuru mpamo ku itabwa muri yombi ry’abo bagabo bane.

Hagaragajwe ko guhera mu kwezi k’Ukuboza 2013 kugera muri Mutarama 2014, ibikorwa byose byo guhungabanya umutekano mu mujyi wa Musanze byakorwaga n’abo bagabo kandi inama zo kubishyira mu bikorwa bazikoreraga mu murenge wa Gahunga.

Ubwo batabwaga muri yombi, bafatanywe n’izindi ntwaro zirimo imbunda ndetse na grenade bari kuzakoresha bakomeza guhungabanya umutekano kandi ngo izo ntwaro zose zaturukaga muri FDLR, umutwe u Rwanda ruvuga ko ari uw’iterabwoba kandi ugizwe n’abasize bakoze Jenoside mu Rwanda.

Kubera ibyo byose ubuyobozi busaba abaturage ndetse n’ubuyobozi bw’inzego z’ibanze gukomeza kuba maso, bagafatanya mu kwibungabungira umutekano ku buryo nta kindi gikorwa cyo guhungabanya umutekano cyakongera kuba nkuko Sembagare Samuel, umuyobozi w’akarere ka Burera abisobanura.

Agira ati “Ni inshingano za buri wese kurinda umutekano w’igihugu. Ni inshingano zacu twese dufatanyije nk’abaturage n’inzego z’umutekano, kandi turizeza Abanyaburera n’Abanyarwanda ko nta kibazo cy’umutekano gishobora kongera kubaho ukundi giturutse ku burangare bw’umwe muri twe.”

Mu ngamba zikomeye zafashwe, ngo buri muturage wese akwiye kujya yibaza ibi bibazo kandi akitegura kubisubiza igihe cyose yabibazwa. Ntitwanze abashyitsi. Ariko se umushyitsi uhari yaje gihe ki? yazanywe n’iki? aramara igihe kingana iki?

Abaturage bo bavuga ko bacyumva ayo makuru byabababaje cyane ngo kuko abo bagabo bahungabanyaga umutekano mu mujyi wa Musanze birirwanaga nabo kandi ngo ntibakekaga ko bakwishora mu bikorwa nk’ibyo.

Bakomeza bavuga ko ariko guhera ubwo biyemeje kongera imbaraga mu kwibungabungira umutekano bakora irondo, abayobozi nabo bafatanya n’abaturage n’inzego z’umuteno, nk’uko Tuyishimire Pacifique, umwe muri abo baturage abihamya.

Agira ati “Byatubereye inshoberamahanga kuko ibyo bisasu byatewe n’abo tutatekerezaga ko bakoraga ibyo bintu. Guhera ubu ngomba kuba ijisho rya mugenzi wanjye, bityo tugafasha abashinzwe umutekano dutanga amakuru mbere y’igihe, tugakumira ikibi kugira ngo kitazongera kubaho.”

Abagabo bashinjwa ibikorwa bihungabanya umutekano byakorewe muri uwo mujyi birimo iraswa ry’umupolisi, iterwa rya grenade mu rugo rw’umuyobozi w’akarere ka Musanze yahitanye umwana wahabaga, n’indi grenade yatewe mu muhanda igakomeretsa abantu batandatu.

Norbert Niyizurugero