Mu mwaka wa 2006 nibwo Nzeyimana Christophe yakatiwe n’urukiko gacaca igihano cyo gufungwa ubuzima bwe bwose nyuma yo guhamwa n’icyaha cyo gusambanya abagore n’abakobwa muri Jenoside yakorewe abatutsi.

Urwo rukiko rwaje no kumukatira igifungo cy’imyaka 25 kubera uruhare yagize muri Jenoside yakorewe abatutsi maze ahita ajyanwa gufungirwa muri gereza ya Rilima, akaba atarahamaze kabiri kuko yahise atoroka.

Polisi ikorera mu Karere ka Bugesera ivuga ko yari imaze iminsi yakira ibirego by’abaturage bo mu Kagari ka Murama mu Murenge wa Nyamata bivuga ko uyu mugabo abambura ibyabo ndetse akanafata abagore ku ngufu, nibwo bamushakishaga ariko bakamubura.

Umunyamabanga nshingwabikorwa w’Umurenge wa Mwogo, Murenzi Jean Marie Vianney, avuga ko mu ijoro ryo kuwa 28 Mata 2015 ari bwo irondo ryaje kumufatira mu Mudugudu wa Gatwe mu Kagari ka Bitaba mu Murenge wa Mwogo ari mu kabari anywa inzoga.

Yagize ati “Yirinze kugira icyo atangaza maze akavuga ko aho dosiye ye yari iri ahazi. Ubundi tubajije polisi itubwira ko yatorotse gereza nyuma yo kutarangiza igifungo yakatiwe n’urukiko gacaca”.

Avuga ko polisi kandi yahise ibatangariza ko uyu mugabo yari amaze iminsi akora ibyaha bitandukanye byo gufata ku ngufu abagore n’abakobwa ndetse no kwambura abantu ibyabo abategeye mu nzira.

Akomeza agira ati “Turasaba abaturage ko bagomba kwicungira umutekano maze umuntu wese babonye bakihutira kubimenyesha inzego z’ibanze n’iz’umutekano, kuko akenshi abanyabyaha bahora bihishahisha”.

Aho afungiye kuri Sitasiyo ya Polisi ya Nyamata ntashaka kugira icyo atangaza.

Ubuyobozi bwa Polisi buvuga ko agiye gusubizwa muri Gereza ya Rilima maze agakomeza igihano yari yarakatiwe, kuko nta kindi ashobora guhabwa kirenze icyo yari yarahawe.

Egide Kayiranga