Biziyaremye Eric n’undi uzwi ku izina rya Edison bafashwe n’irondo mu murenge wa Ngeruka, mu kagari ka Ngeruka mu mudugudu wa Binyonjwe mu masaha ya saa saba z’ijoro bapakiye toni ebyiri z’ibiti by’umushikiri, ubu bakaba bacumbikiwe kuri sitasiyo ya polisi ya Nyamata.

Polisi kandi yanafashe imodoka yo mu bwoko bwa FUSO ifite numero ziyiranga RAA 693D yakoreshwaga mu gutwara ibi biti by’umushikiri.

Iperereza rya polisi ryerekana ko ibi biti babinyuza ku mipaka itemewe yo mu karere ka Nyagatare bakabigurisha n’Abanya-Uganda, ubundi bikoherezwa ku mugabane wa Asiya cyane cyane mu gihugu cya Malaysia.

Mu cyumweru gishize hafashwe indi kamyo itwaye toni zigera kuri esheshatu z’ibiti by’umushikiri yafatiwe mu karere ka Gatsibo yerekeza mu karere ka Nyagatare, hanafatwa umushoferi wari uyitwaye.

Hagati mu kwezi gushize kandi nabwo hari hafashwe amakamyo abiri nayo mu Ntara y’Uburasirazuba atwaye toni zigera ku icumi zerekeza Nyagatare.

Ibiti by’umushikiri bikunze kuboneka mu Ntara y’Uburasirazuba ni kimwe mu bikoresho by’ibanze byifashishwa mu gukora imibavu n’amavuta yo kwisiga.

Gutema no kugurisha ibi biti bihanwa n’itegeko ribuza kwangiza ibidukikije riteganya igifungo kiri hagati y’amezi atandatu n’imyaka itatu, n’ihazabu iri hagati y’amafaranga ibihumbi 200 na miliyoni eshatu.

Emmanuel Nshimiyimana