Mu gitondo cyo kuri uyu wa kabiri tariki 10 Ugushyingo 2015, nibwo aba baturage batoragoye uru ruhinja mu Kagali ka Saruhembe mu murima w’ibishyimbo bigaragara ko rwanizwe, nk’uko byatangajwe n’umunyamabanga nshingwabikorwa w’aka kagali Mutabaruka Venant.

Avuga ko uwamutaye yabanje kumuniga kuko yari ameze nabi umubiri wose wuzuye ibikomere. Yagize ati “Bishoboka ko byakozwe n’umukobwa, kuko mbere yo kumuta yabanje kumunigagura. Twamugezeho yuzuye ibisebe umubiri wose ava amaraso mu kanwa no mu mazuru ariko agifite akuka.”

Yavaga amaraso menshi mu kanwa no mu mazuru afite n’ibisebe umubiri wose.

Mutabaruka akomeza avuga ko bahise bamugeza ku kigo nderabuzima cya Mahama bamushyira mu byuma bimufasha kugarura ubuzima. Babonye akomeje kuremba bamwohereza mu bitaro bya Kirehe, ariko bikomeza kwanga ashiramo umwuka.

Yavuze ko bafatanyije na Polisi bakomeje gushakisha uwaba yakoze ubwo bugome bagerageza no kugera ku bakobwa bose bakeka ko batwite basanga nta kibazo bafite.

Yasabye abaturage kujya birinda kwangiza ikiremwamuntu batanga amakuru igihe cyose babonye ko hari icyatera ibibazo.

Ati “Abaturage bakwiye kujya batanga amakuru ku bantu babona bafite ibibazo. Abakunze kwica abana usanga ari abakobwa baba batwaye inda zitateguwe, abantu nkabo dukwiye kujya tubamenya tukababa hafi n’abajyanama b’ubuzima bakadufasha kuko baba babakurikirana umunsi ku wundi.”

Servilien Mutuyimana