Iki cyemezo cyafashwe n’inzego zitandukanye mu nama yakozwe irimo na minisitiri w’uburezi Dr Vincent Biruta ku gicamunsi cya tariki 02/06/2013 nyuma y’amasaha macye inyubako abo banyeshuri biga mu cyiciro cya kabiri bararagamo ifashwe n’umuriro.

Aya macumbi yatangiye gushya saa sita z’amanywa yahiriyemo ibikoresho byose byarimo ariko ku bw’amahirwe nta muntu wahitanywe n’uyu muriro kuko abanyeshuri bari bagiye mu mikino itandukanye.

Ubuyobozi, inzego z’umutekano n’abaturage bafatanyije kuzimya iyi nkongi y’umuriro.

Ababyeyi bari baje kureba abana babo ntibishimiye ko hataha aba bana gusa, kuko bo bavugaga ko abana bose bakwiye gutaha hakabanza hakamenyekana igitera izi nkongi z’umuriro zimaze kuba ubugira gatatu muri iki kigo.

Abanyeshuri biga mu mwaka wa gatandatu, nabo bari mu batashye, baravuga ko bahangayikishijwe n’ikizamini cya Leta bagomba gukora uyu mwaka, ngo kuko amakaye yabo yose yarahiye kuburyo kuzabona aho bigira bizabagora cyane.

Iyi nkongi yongeye kwibasira aya macumbi nyuma y’aho tariki 20/05/2013 na 23/04/2013 yari yahiye agakongoka.

Nubwo abashinzwe kuzimya umuriro baturuka kure, bagerageza gushyiraho akabo mu kuzimya iyi miriro.

Ubwo uyu muriro wibasiraga iki kigo ku nshuro ya mbere tariki 23/04/2013, ugatwika icumbi ry’abana b’abahungu bigaga mu kiciro cya mbere cy’amashuri yisumbuye nabwo ikemezo nk’iki cyarafashwe hataha abanyeshuri 409.

Ku nshuro ya kabiri 20/05/2013 bwo aba banyeshuri ntibongeye gutaha kuko hakozwe ibishoboka abana bagakomeza amasomo.

Iri shuri risanzwe rizwiho kuza mu myanya ya mbere mu gutsindisha abanyeshuri benshi mu kizamini cya Leta. Kugeza ubu ntiharamenyekana icyaba cyihishe inyuma y’izi nkongi z’umuriro.

Inyubako yahiye yegeranye n’iyari yahiye ku nshuro ya mbere.

Hari hasgize iminsi umuyobozi w’ishuri ES Byiamana, Frere Gahima Alphonse, atangaje ko bagiye gushyiraho abashinzwe umutekeno bazajya baba muri aya macumbi amasaha 24/24 mu rwego rwo gucukumbura igitera izo nkongi z’umuriro.

Eric Muvara