Rucagu Boniface avuga ko mbere ya Jenoside yakorewe Abatutsi umuco w’itorero wari warakuweho kuburyo nta kurera Abanyarwanda byari bikiriho aribyo byaje guteza ayo mahano ya Jenoside.

Agira ati “ubundi uyu muco wo kurera Abanyarwanda neza wavanyweho n’abakoloni, nyuma n’abayobozi babi, barangwaga n’imico mibi y’umururumba ubusambo n’inda nini; bituma umuco wo kurera Abanyarwanda neza ucika. Nibyo byatugejeje ku mahano ya Jenoside yakorewe Abatutsi muri 1994”.

Akomeza avuga ko ku bw’amahirwe ingabo za FPR-Inkotanyi zahagaritse Jenoside, zishyiraho Leta y’Ubumwe bw’Abanyarwanda. Iyo Leta nayo ishyiraho gahunda nyinshi z’iterambere n’izo kubanisha Abanyarwanda.

I Nkumba ahabera itorero ry’igihugu.

Yongeraho ko muri iyo gahunda ya Leta y’Ubumwe bw’Abanyarwanda yo gutoza Abanyarwanda uburere bwiza ariho haje itorero ry’igihugu. Itorero ry’igihugu ribera mu kigo cy’i Nkumba, mu murenge wa Kinoni, mu karere ka Burera.

Agira ati “ubu Leta y’Ubumwe bw’Abanyarwanda irahamagara Abanyarwanda ikabashyira hano (i Nkumba) ikabatoza imico myiza, ikamara icyumweru, ikama ukwezi, ikamara amezi abiri itoza Abanyarwanda imico myiza”.

Kuri ubu nihagira Umunyarwanda ukora ikibi ntazabona icyo yitwaza kuko Leta y’Ubumwe bw’Abanyarwanda itoza abantu imico myiza kandi ikigisha ku mugaragaro. Imico mibi Abanyarwanda bagomba kuyisezerera; nk’uko Rucagu abishimangira.

Abanyarwanda batandukanye bajya mu itorero, bigiramo indangagaciro ndetse na za kirazira z’umuco nyarwanda kuko arizo Leta y’Ubumwe bw’Abanyarwanda ishingiyeho kugira ngo igere ku iterambere rirambye.

Abarangije itorero bitwa “Intore” basabwa gusangiza abandi ibyo bigiye mu itorero kuko Intore isangira n’abandi.

Norbert Niyizurugero