Iyi Komisiyo yatumiye umuhanzi Muyango Jean-Marie, n’umuhanzi Ruti Joel ndetse na Mariya Yohani Mukankuranga kugira ngo baganire barebere hamwe uko ururimi rw’Ikinyarwanda rwasigasirwa uko bikwiriye.

Zimwe mu mbogamizi aba bahanzi bagaragarije Abadepite ni uko usanga Abanyarwanda benshi bafite amateka atandukanye atuma batavuga Ikinyarwanda cy’umwimerere.

Umuhanzi Muyango yasobanuye ko nubwo Abanyarwanda baba mu gihugu kimwe usanga uturere tumwe na tumwe dufite imvugo twihariye, bitandukanye n’ahandi.

Ati “Iyo ugiye mu Majyaruguru usanga bavuga Urukiga, wajya ahegereye imipaka y’i Burundi ugasanga bavuga Ikirundi. Ikindi ubu u Rwanda rutuwe n’Abanyarwanda bataruvukiyemo ngo barukuriremo, izo na zo ni impamvu zo kutanoza neza Ikinyarwanda”.

Gusa agarutse ku mikoreshereze y’ururimi rw’Ikinyarwanda mu buhanzi asanga ari ikibazo gikomeye kuko abenshi bahanga bavangavanga indimi ugasanga n’ubutumwa bukubiye muri ibyo bihangano butumvikana.

Ikibazo cyo gukoresha Ikinyarwanda cy’umwimerere cyiza kitavanzwemo izindi ndimi ndetse no kukigoreka cyagarutsweho n’umuhanzi Ruti Joel wavuze ko abenshi mu bahanzi bavanga indimi kubera kumva ko ari byo bigezweho.

Ikindi yavuze gituma bavanga indimi bituruka ku kuba umunyeshuri wiga mu mashuri abanza adafashwa kuvuga neza ururimi rwe ahubwo ababyeyi be bakamushishikariza kuvuga Igifaransa cyangwa Icyongereza.

Ruti Joel yitanzeho urugero avuga ko na we ubu aba avuga Ikinyarwanda kidasobanutse ariko kuko yafashijwe na Sekuru ubwo yigaga mu mashuri yisumbuye, bituma akivuga neza.

Ati “Ubu nanjye mba mvuga Igifaransa gusa, ni uko Sogokuru yamfashije kukivuga neza bigatuma nanjye ntakigoreka”.

Gusa Ruti avuga ko mu bahanzi bikiri ikibazo gikomeye kuko abenshi bavanga indimi ndetse ugasanga baririrmba babivangavanga.

Umuhanzi Mariya Yohani yavuze ko hakwiriye ubukangurambaga mu rubyiruko kuko ari rwo rufite iki kibazo cyo kugoreka Ikinyarwanda haba mu mivugire no mu myandikire.

Perezida wa Komisiyo y’Uburezi, Ikoranabuhanga, Umuco, Siporo n’Urubyiruko, Depite Furaha Emma Rubagumya, yavuze ko abahanzi bakwiriye kugira uruhare mu gukosora imivugire y’Ikinyarwanda.

Ati “Ukajya kumva umuntu ashaka kubwira undi ko yamuhaye ikintu, ngo yamuhereje, ukumva ngo natariye, natamubonye, ibyo byose ni Ikinyarwanda kigoretse. Mufashe abagoreka ururimi barukosore”.

Depite Rubagumya yasabye ko habaho ubufatanye mu ngeri zose kugira ngo havugwe ururimi rw’Ikinyarwanda neza kuko usanga uburyo cyigishwa mu ishuri atari bumwe kandi hakoreshejwe imfashanyigisho imwe.