Urwego rwa madamu ruhabwa umukobwa wateye intambwe akava mu cyiciro cy’abakobwa akinjira mu bashatse mu buryo bwubahirije amategeko ni bwo bavuga bati: “uriya ni madamu kanaka”. Ni urwego, ibyo twakita mu rurimi rw’igifaransa titre y’ishema cyangwa y’icyubahiro bitewe n’uko ubifata kwitwa umugore.

Abantu batandukanye baganiriye na Kigali Today ntibabyumva kimwe kandi ntibabivugaho kimwe. Hari abavuga ko ari byiza kwivuga ko uri madamu mu ruhame cyangwa uganira n’umunyamakuru kuko biguha agaciro abantu ntibagusuzugure n’ibyo uvuze bigahabwa agaciro.

Uwamaliya yagize ati: “Yego birakimaze kuko akenshi iyo uri mu ruhame hari ubwo abantu bashobora kugusuzugura bitewe n’igihagararo bakagira ngo uri nkumi bakaba bakubwira ibyo biboneye nyamara iyo bamaze kumenya title yawe barakubaha bakakubahira n’icyo uricyo kuko birakenwe muri societe”.
Minani Lambert yunzemo ati: “Mbona ari ngombwa cyane kubera ko abantu bamwumva bamuha agaciro bitewe n’urwego arimo”.

Ku bavuga ko ari ngombwa kuvuga madamu basanga bikuraho urujijo niba akiri inkumi cyangwa yarashatse n’ushaka kuba yasaba umubano amenye uko yakwitwara cyangwa niba yasubiza amerwe mu isaho.

Ku rundi ruhande, hari abantu bashimangira ko atari ngombwa, impamvu batanga ni uko madamu itaza imbere y’amazina ngo wabivuga gusa igihe usabwe kwivuga ku buryo burambuye.

Evariste Mukiza ati: “Self-Introduction: ikiba gikenewe n’amazina, icyo umuntu akora na academic qualification [impamyabumenyi afite] kuba uri ingaragu, umugabo, umugore, n’ibindi nta gaciro bifite. Byagira agaciro usabye umuntu gutangaza uwo ariwe wese (full presentation).”

“Ndabona byaterwa n’urwego ubimubajijemo: niba uri umunyamakuru ukeneye interview, si mbona impamvu uwo mugore yagusubiza ko ari madamu kanaka... ubundi yakagombye kuvuga izina rye nta bindi byinshi agakurikizaho ibijyanye n’icyo umubajije…” uko ni ko Bosco Ryagaragaye abisobanura.

Kuri ibi, Hakizimana Theogene we, avuga ko atari ngombwa ariko n’uwabishyiraho byaba ari ubusirimu ibyo yise civilisation, aho yagize ati: “Ku bwanjye numva atari ngombwa gushyira madamu cyangwa bwana imbere y’amazina igihe umuntu yivuga. Gusa kubishyiraho nabwo numva ntacyo bitwaye, nabifata nka une sorte de civilisation [ ubusirimu] ku muntu ubikoze.”

Madamu ni titre y’icyubahiro uhabwa n’abandi by’umwihariko bitewe n’inshingano z’ubuyobozi, urugero madamu muyobozi w’akarere ariko umuyobozi w’akarere ubwe ntazivuga mu ruhame maze ngo aterure agira ati: “madamu umuyobozi w’akarere.” Ibi bivuze ko abantu nibo baguha iyo titre bijyanye n’inshingano zawe.

Ikindi, kuba wavuga ko uri madamu hari abantu bishobora kubangamira cyane cyane nk’abakobwa babyaye ibinyendaro cyangwa ababuze ababakura ku ishyiga bishobora kubatera ipfunwe mu gihe kandi utabivuze wambaye impeta dore ko abagore bakunda kuzambara ubwayo irabyivugira.

Nshimiyimana Leonard