Ibi ngo byahindutse nyuma y’uko abantu benshi basabaga abashinzwe aya marushanwa ko bakongera imyaka dore ko abiyumvamo ubushobozi bwo guhatana ari benshi ariko bagasanga imyaka yari yaratangajwe mbere bayirengeje.

Jean Claude Ndayishimiye, umuyobozi wa Premier Model Agency asobanura ko nubwo muri aya marushanwa hazagaragaramo benshi basanzwe bagaragara mu marushanwa y’ubwiza (nyampinga), hatazatorwa urusha abandi ubwiza ahubwo hazatorwa abazahiga abandi mukwiyereka no kwifotoza mu gihe cyo kumurika imideli.

Yagize ati: “aya marushanwa atandukanye cyane n’aya Nyampinga kuko hano icyo tugamije ntabwo ari ugutora uhiga abandi ubwiza ahubwo ni uhiga abandi mukwiyereka mu buryo bw’umwuga. Muri aya marushanwa nta n’ibibazo bazabazwa cyangwa se izindi mpano bazagaragaza nk’uko bigenda mumarushanwa ya Nyampinga…”

Yanavuze kandi ko aya marushanwa atareba gusa abasanzwe bamurika imideli ba hano mu Rwanda gusa ahubwo ko n’abatari basanzwe babikora ariko biyumvamo iyo mpano bibareba.

Abazatsinda muri aya marushanwa bazahabwa ibihembo binyuranye kandi byiza ariko kugeza ubu ntibiratangazwa. Kwiyandikisha bizarangira tariki 17/11/2012 naho imyitozo yo izatangira tariki 18/11/2012.

Kwiyandikisha bikorerwa kuri UTC muri Keza Saloon no muri DDC Beauty nayo yegeranye na Keza Saloon, kuri Lemigo Hotel muri Gift Shop no kuri Radio Authentique Kicukiro ku muhanda ujya Bralirwa.

Kwiyandikisha ni amafranga 5000 guhera saa tatu za mugitondo kugeza saa kumi n’imwe z’umugoroba.

Marie Clemence CYIZA UWIMANIMPAYE