Mbere, guhiga byakorwaga n’abantu benshi bakica inyamaswa z’amoko yose, iziribwa n’izitaribwa, ugasanga umuhigo urashimishije, bamwe bakabikora nk’umwuga ubatunze umunsi ku wundi. Ariko ubu si ko bimeze, Mporanyimana Ernetse, avuga ko guhiga bitagira umusaruro babikora bagira ngo bakize abaturage inyamaswa zibonera bakabashakira inzoga.

Ubwo yari kumwe n’abandi bahigi bishe inyamaswa eshatu zitwa ingunzu tariki 07/11/2013 mu Murenge wa Gakenke, Mporanimana yagize ati: “nk’umuntu arakubwira ngo ngwino nk’ibisimba birimo kunyonera, byamfatiye amatungo, tukagenda tukabihiga gutyo bimwe tukabyica, ibingibi twishe biba byafashe nk’intama, nk’umuturage akakwemerera inzoga…”.

Iyobangira ari kumwe n’imbwa z’impigi.

Ikindi, ibyo bisimba barabibaga bakabigaburira imbwa bahigisha, ibindi ngo bikorwamo imiti ya Kinyarwanda, uruhu rwayo barugurisha amafaranga ibihumbi bitanu.

Iyobangira Felecien, umuhiga wo mu Murenge wa Janja yabisobanuye atya: “… nk’iki [ingunzu] mba nishe kimwe imbwa zirakirya ibindi bikorwamo imiti, nka ruriya ruhu hari icyo rukorwamo….baguha bitanu.”

Umwana w’imyaka 15 witwa David avuga ko yabyutse saa cyenda za mugitondo afatanya n’abantu bakuze guhiga kuko ari byiza, na we yungamo avuga ko inyamaswa bishe zivura amabere.

Imiti ikorwamo muri izo nyamaswa z’ishyamba ntishirwa amakenga, ngo ishobora kuba ikoreshwa n’abantu bagambiriye guhumanya abantu; nk’uko umwe mu baturage utashatse ko amazina ye atangazwa abivuga.

David ahetse umuhigo we, ingunzu yishe.

Mu magambo ye ati: “Biriya bisimba baba bafite ababibatumwe….. ibyari byo byose menya ko abahigi ari abarozi ni ukuvuga ko n’ababibatuma nabo ni abarozi none se ko bitaribwa babikoresha iki usibye guhumanya abantu.”

Uyu muturage yongeraho ko azi umuntu baturanye waretse gucuruza caguwa yigira guhiga na n’ubu nibyo akora kuko abagore bamutumaga injangwe zakoreshwaga mu guhumanya abantu bakamuha amafaranga menshi.

Nshimiyimana Leonard