Muri rusange, ababyeyi babonye uko abo bakobwa babyina bababajwe no kubona abakobwa bitwara batyo. Ngo ntibashimishijwe n’uko babyinana n’abahungu, mu maso y’abantu bose.

N’akababaro kenshi, umubyeyi umwe yagize ati “iriya si imibyinire. Wabonye aho umukobwa yurira ku bitugu by’umuhungu! Wabonye aho umukobwa ashyira umunwa we ku gitsina cy’umuhungu, ibyo byose mu ruhame abantu bamureba? Niba ari ibi tubyarira, njye nimbyara umukobwa sinzamwonsa”.

Ababyeyi ntibishimiye uko uyu mukobwa n’umuhungu bari kubyinana

Hashize akanya gato uyu mubyeyi yisubiraho agira ati “mbyaye umukobwa najya mwonsa rimwe ku munsi kuko na none sinamwicisha inzara, icyakora kubyara umukobwa kuri iki gihe ntacyo bimaze”.

Umubyeyi wundi wari hafi y’uyu nguyu na we ari kunywa ikigage, dore ko aba babyeyi bari bavuye mu isoko batashye, yagize ati: “njye sinkibyara ariko umukobwa wanjye aracyabyara. Ubu buriza bwe (yerekanaga akana gatoya k’umwaka umwe) ni umukobwa, ariko niyongera kubyara umukobwa sinzamushigishira igikoma. Nta kubyara abakobwa bazitwara nk’abo mbonye hirya aha”.

Ngo iyi mibyinire si iya kinyarwanda

Undi mubyeyi wari hafi aho yagize ati “mwatangaye cyane kuko ari ubwa mbere mwabona ababyina kuriya. Iyaba mwabonaga uko babyina kuri televiziyo, hari abakora ibirenze biriya”.

Ababyeyi b’abagabo se bo batekereza iki kuri iyi mibyinire? Uwitwa Hakizimana Augustin, umugabo w’igikwerere utuye mu Murenge wa Rwaniro na we wari waje muri iri soko, yari ahagaze yishingikirije agakoni, areba aho aba bakobwa babyina, ubona asa n’uwumiwe.

Mubajije icyo atekereza kuri iyi mibyinire yagize ati “Njye numiwe. Ni uko twe dutuye mu biturage abakobwa bacu bakaba batazakora bene ibingibi, ariko ababyaye bariya bari kubyina nta cyo babyaye. Icyakora uwanjye naramuka avuye mu giturage akagera aho abyina kuriya, azajye kubana n’abo babikorana ntazangarukire iwanjye”.

Ngo uyu musore n’umukobwa ntibitwaye neza mu mibyinire

Nyuma yo kwiyumvira, Hakizimana yunzemo agira ati “yego ni amajyambere, ariko kubona umwana w’umukobwa azamura akaguru akagashyira ku mutwe w’umuhungu ntibisanzwe. Ko wabonye se basabye abantu kubaha amashyi, wabonye hari ayo babahaye? Wenda mu mujyi bo babona ari byiza, ariko hano iwacu babigaye”.

Abanyarwanda bati “iritavuze umwe!”. Abandi bati “nitwubakira ku muco wacu ni bwo tuzatera imbere … urugero rufatika ni ibihugu nk’ubuyapani”. Ese iyi mibyinire amasosiyete y’itumanaho akunda kwifashisha mu kwamamaza ibikorwa byayo na yo ikwiye guhindurwa? Abatekerereza igihugu ni bo batezwe amaso.

Marie Claire Joyeuse