Saa kumi n’imwe za nimugoroba nibwo abantu batangiye kwinjira muri tent yitwa “igicumbi cy’umuco” aharebana n’umuryango nimero 10 wa sitade amahoro. Imbere y’igicumbi hari hatatswe ku buryo bwa gakondo nk’ibyansi, ibicuma, imisambi, inyegamo n’amasaro.

Indangamirwa zabyinnye imbyino n’indirimbo nyinshi zitandukanye zirimo; imishagiriro, ikinimba, insengo, ikinyemera, igishakamba, inkombo, nizo zakiriye abari bitabiriye ikigitaramo.

Uko indirimbo yasozwaga n’itsinda ry’abasore b’Indangamirwa ni na ko itsinda ry’inkumi z’Indangamirwa zahitaga zikurikira ku buryo umudiho wacinywe ubutitsa kumara amasaha nta guhagarika.

Janvier Karangwa, umwe mu basore bindangamirwa, yagize ati “nyuma y’imyaka igera kuri ine Indangamirwa yiyubaka kandi inizihiza ibirori ahantu hatandukanye, twabateguriye igitaramo cyo mu rwego rwo hejuru rwo kumurikira abakunzi b’umuco nyarwanda.”

Mu ijambo rye, Ministiri w’umuco na siporo, Protais Mitali, yavuze yagize ati “mu matorero ya mbere mu Rwanda nsanzwe nzi, n’Indangamirwa nzajya nyibaramo kuko icyi gitaramo cyanyu cyari cyiza cyane”.

Nyuma y’imbyino zakurikiranaga ntakwitsa nk’izo kuri MP3 player, hakurikiyeho umukino nyigisho mu kuzingatira umuco nyarwanda. Uyu mukino wagaragaje ubwiza bwo kumenya ururimi rw’ikinyarwanda hamwe no gukunda umuco nyarwanda.

Nyuma yaho hakurikiyeho imyiyereko nyarwanda aho abasore bambaye impuzu n’inkumi zambaye ishabure zatambutse mu ngendo y’abeza banerekana bimwe mu bikoresho bya kinyarwanda bya cyera.

Mwisoza ry’iki gitaramo, amatsinda yombi, iry’abasore n’iry’abakobwa b’Indangamirwa, yahuriye mu mbyino nshya harimo iz’Imana n’iz’igikiga maze bazibyina banaziririmba karahava.

Jovani Ntabgoba