Uyu mugabo ubu ufite imyaka 57 abasha gushaka amazina ya buri muntu muri telephone ye agahamagara uwo ashaka ndetse akamenya n’amafaranga ari muri telephone. Abasha kandi kumenya ko ageze iwe kuburyo iyo bamutwaye ku kinyabiziga batamurenza kuko ahita ababwira ko yahageze.

Kubera ubunyangamugayo ubushishozi n’ikinyabufura biranga uyu mugabo byatumye ashingwa ibikorwa byinshi ahagarariye mu karere ka Rusizi harimo kuba umuyobozi wa koperative ABANZE UMUGAYO ikora ubworozi ubu bakaba bamaze kwigurira imoto.

Remy ari kuri moto yiguriye.

Uretse ibyo kando ari muri komite y’abantu bane batowe ku rwego rw’igihugu bashinzwe gukemura amakimbirane mu batabona, ndetse n’akarere kamugize umwe mu bashinzwe guhugura abantu bazajya guhugura abandi kwirinda agakoko gatera SIDA.

Bimenyimana abasha kwandikisha imashini y’abatabona yaguriwe n’akarere ka Rusizi, kubera ibikorwa akora bitandukanye atangaza ko yabashije kwiyubakira inzu, afite ipikipiki yaguze miliyoni imwe n’ibihumbi 200 ndetse n’inka yororera mu ikiraro.

Remy n’umugore we bivanye mu bukene.

Bimenyimana afite ibyangombwa yahawe n’ibitaro bya Kabgayi, Gihundwe, Butare n’ibindi, bagaragaza ko afite uburwayi budakira bwo guhuma amaso yombi ariko abasha kuvuga Igifaransa neza kuko ngo yize amashuri atandatu abanza yongeraho rimwe ry’ababana n’ubumuga bwo kutabona.

Ikimubabaza ngo nuko bamubwira ko umugore bashakanye ari mwiza ariko akaba atabasha kumureba usibye kumva ijwi rye gusa kuko yamushatse yaramaze guhuma.

Bimenyimana Remy numugore we babyaranye abana 10.

Uyu mugabo umaze kubyara abana 10 avuga ko yakiriye impano yo kubona akoresheje amaso y’umutima kandi ngo ibyo yagezeho byose abikesha kubaha Imana no kuyisenga.

Musabwa Euphrem