Ukuriye urwego rushinzwe kurwanya SIDA mu karere ka Rusizi, Serubungo Janvier, yavuze ko urugaga rw’ababana na VIH/SIDA (RRP+) rukwiye kujyanisha gahunda zarwo na gahunda z’igihugu yo kurwanya SIDA cyanecyane iyo gukumira ubwandu bushya.

Serubungo yagize ati “Turasaba ubuyobozi bushya bwatowe kudufasha bakangurira ababana na VIH/SIDA gukangurira ababyeyi kudakomeza kubyarira mu bwandu”.

Umuyobozi mushya w’urugaga rw’ababana na VIH/SIDA mu karere ka Rusizi, Nyirangirimana Judence, yemeje ko bagiye gukoresha uburyo bwose bushoboka bakigisha abatarandura kugira ngo birinde kwandura VIH/SIDA.

Nyirangirimana yagize ati “tuzabahuriza hamwe tubabwire ububi bwo kwandura VIH/SIDA tubasobanurire ingaruka mbi zo kwandura SIDA bakure babizi ku buryo nabo babyigisha n’abandi”.

Buri karere k’u Rwanda gafite ubuyobozi buhagarariye urugaga rw’ababana na VIH/SIDA (RRP+) butorwa n’abanyamuryango bibumbiye mu mashyirahamwe y’ababana na VIH/SIDA azwi.

Jean Baptiste Micomyiza