Ni umunsi watangiye kwizihizwa kuva mu 1987 hagamijwe gukangurira abantu ku ngaruka mbi z’itabi ku buzima no gushishikariza abarikoresha kurireka.

Intego nyamukuru y’uyu munsi ni uguteza imbere ubuzima bwiza no kugabanya indwara n’impfu ziterwa n’itabi.

Mu Rwanda, raporo zigaragaza ko abantu bagera ku 5,500 bapfa buri mwaka bazize indwara zifitanye isano no kunywa itabi.

Itabi kandi rifite uruhare rwa 5.5% by’impfu zose ziba mu gihugu, kandi mu 2024, habarurwaga abanywa 491,000 mu gihugu.

Raporo y’⁠Ishami ry’Umuryango w’Abibumbye ryita ku Buzima igaragaza ko Abanyarwanda bagera kuri 11.6% bafite imyaka 15 kuzamura bakoresha itabi cyangwa ibirikomokaho.

Itabi si icyorezo, si n’ikiribwa cy’ibanze umubiri ukeneye, ndetse umuntu ashobora kurireka maze ubuzima bugakomeza.

Dore intambwe zikurikizwa ku muntu ushaka kureka kunywa itabi.

1. Gena itariki uzarekeraho itabi
Hitamo umunsi runaka mu byumweru bibiri biri imbere maze wiyemeze guhagarika gukoresha itabi burundu.

2. Menya ibigutera kurikoresha
Shakisha ibintu cyangwa ibihe bituma uryifuza, nko kugira stress, kunywa inzoga, kuba hamwe n’abarinywa cyangwa ibikorwa usanzwe ukora buri munsi.

3. Kuraho ibikoresho byose bifitanye isano n’itabi
Jugunya cyangwa uvanemo itabi, amacupa yo kuricanaho, ibibirika n’ibindi byose bishobora kugutera kuryifuza.

4. Saba ubufasha
Bwira umuryango n’inshuti gahunda yawe yo kurireka kugira ngo bagushyigikire. Ushobora no kugisha inama umuganga cyangwa kwinjira mu matsinda afasha abifuza kurireka.

5. Uko wakwitwara igihe uryifuje

Tegereza iminota mike mbere yo gufata icyemezo.
Nywa amazi.
Humeka cyane kandi buhoro.
Ihugure mu kindi gikorwa.
Kora siporo cyangwa ugende n’amaguru.

6. Koresha ubundi bufasha igihe bibaye ngombwa
Hari imiti cyangwa uburyo bwo kugabanya ubushake bwo kunywa itabi. Banza ugishe inama umuganga cyangwa undi mukozi w’ubuzima.

7. Gira imibereho myiza
Kora imyitozo ngororamubiri, urye indyo yuzuye, uruhuke bihagije kandi ushake uburyo bwo kugabanya stress.

8. Witegure ibimenyetso byo kurireka
Mu minsi ya mbere ushobora kugira umujinya, guhangayika, kubura ibitotsi cyangwa kurushaho kuryifuza. Ibi birasanzwe kandi bigenda bigabanuka uko iminsi ishira.

9. Nutakaza intego ntucike intege
Niba wongera kurikoresha, suzuma icyabiteye maze wongere utegure uburyo bwo gukomeza urugendo rwo kurireka.

10. Ishimire intambwe ugezeho
Wizihize buri munsi, buri cyumweru cyangwa buri kwezi umaze utarikoreshwa. Uko igihe kigenda, ubuzima bwawe, guhumeka neza n’ubushobozi bwo kuzigama amafaranga birushaho kwiyongera.

Wibuke: Icyifuzo cyo kunywa itabi akenshi kimara iminota mike gusa. Buri munsi umara utarinywa ni intambwe ikomeye iganisha ku buzima bwiza.