Ikinyamakuru medscape.com kivuga ko indwara y’agahinda gakabije, ari indwara abantu benshi bakunda kugira bayitewe n’ibintu bibi byinshi bitandukanye baba barahuye na byo.

Mu gihe ubana n’umuntu ufite iki kibazo cy’indwara y’agahinda gakabije (dépression) ni ukugerageza kumwumva no kumenya ikintu cyamuteye ako gahinda ubundi ugatangira kumuhumuriza.

Gufasha umuntu wahuye niyi ndwara ni ukumenya kumutega amatwi ukamenya icyamuteye kugira agahinda gakabije ukabona gutangira kugenda umuganiriza umufasha kubona cya kintu cyamuhungabanyije nk’ikintu gisanzwe ndetse byaba ngombwa ukamuganiriza uburyo bwo kwiga kubana na cyo ariko kitamwangirije ubuzima. Umurwayi iyo abasha kuvuga bimufasha kugenda akira ibikomere buhoro buhoro.

Gukira iyi ndwara ni urugendo rukorwa buke buke kugira ngo bimufashe gukira neza abifashijwemo n’abajyanama mu by’ihungabana.

Iyi ndwara hari igihe igera ku rwego rwo hejuru ugasanga ubujyanama ari ngombwa ariko bugaherekezwa n’imiti.

Bimwe mu bimenyetso byakwereka ko waba wugarijwe na dépression, ku buryo mu gihe wakwisangaho kimwe cyangwa byinshi muri ibi bimenyetso, ukwiye kugana inzobere mu by’ubuzima bwo mu mutwe zikagufasha. Bimwe muri byo ni ukumva ntacyo ukimaze, kurakazwa n’ubusa, kubura ibitotsi.

Ku rundi ruhande, no kuryama cyane bishobora kuba ikimenyetso cyo kwiheba no kwigunga bikabije, kunanirwa vuba, kurota inzozi mbi ndetse ziteye ubwoba, kumva ntacyo ushaka gukora, kumva ushaka kuba wenyine.

Mu gihe wumva utangiye kugira ibitekerezo byo kumva ushaka kuba wenyine, gerageza ushake uwo wizeye mwabiganiraho, kandi wirinde kuba wenyine igihe kirekire.

Igihe ubonye ibyo bimenyetso, ni byiza ko utangira guhindura imibereho wabagamo ariko ugashaka uwagufasha.

Niba hari ikitagenda neza mu rugo wituma kiguhangayikisha cyane, umukoresha cyangwa umukozi ku kazi wakubwiye nabi ni byiza kandi kwimenyereza kwita cyane ku byakuzanira umunezero.

Kwiga kubana neza n’abandi no kumenya gusenga bifasha kumva ugize amahoro y’umutima.

Niba ufite amahirwe yo kugira abavandimwe bishyiremo umwete mugirane umubano mwiza. Abantu bafitanye umubano uzira umwiryane n’abavandimwe babo, bagira ubuzima burimo ibyishimo.

Kuryama ugasinzira na byo biri mu bifasha umuntu kuruhuka neza ku buryo bimufasha na byo gukira indwara y’agahinda.

MENYA UMWANDITSI

Ernestine Musanabera

Umunyamakuru

@ musanatines

Reba inkuru zose nanditse ( 1091 )