Abantu bamwe bemeza ko iyo aho batuye hari buze umuyobozi uwo munsi bashyiramo amazi meza ndetse bakahashyira n’isabuni ariko bikarangira muri ako kanya ni nako ya mazi nyine asaziramo kugeza igihe hazagarukira abayobozi.

Umugabo umwe ucuruza inzoga mu murenge wa Mugina mu karere ka Kamonyi yadutangarije ko ngo abakiriya be badafite umuco wo gukaraba bavuye mu bwiherero akaba ariyo mpamvu hari akajerikani kasaziyemo amazi harimo n’udukoko.

Abo yita abakiriya be nabo baqracyafite umuco wo gusangirira ku muhaha umwe ariko iyo Gitifu (umuyobozi w’akagali) ahahingutse barawuhisha kubera gutinya ibihano.

Ku biro by’umwe mu mirenge igize akarere ka Ngororero hari aho bateganyirije Kandagira Ukarabe hari akajerikani karimo ubusa binagaragara ko nta mazi aherukamo. Abonye umunyamakuru areba muri ako kajerekani, ushinzwe isuku yihutiye ashyiramo amazi.

Uko biri kose abantu bakwiye kwiyumvisha ko kugira isuku cyane cyane ku mibiri yabo bidafitiye akamaro abayobozi gusa kuko iyo ingaruka zije zihera ku bagize umwanda.

Hamwe n’izindi gahunda zose abaturage bakangurirwa gukora ariko bikarangirana n’iminota bakiri kumwe n’abayobozi, buri wese akwiye kumva ko iterambere nyaryo ari irikozwe n’ubikuye kumutima.

Ernest Kalinganire