Umuti wa viagra ushobora gutera ingaruka zirimo kutabyara n’ubugumba

Ibi biravugwa mu gihe umubare w’abagabo n’abasore bawukeneye ukomeje kwiyongera aho bamwe bawugura banifashishije ikoranabuhanga rya murandasi, aho miliyoni zirenga esheshatu zawuguze muri farumasi ibihumbi birindwi zo kuri murandasi.

Umuti wa viagra wavumbuwe mu mwaka wa 1998, ubwo abashakashatsi mu by’ubuzima bariho bapima umuti wo kuvura umuvuduko w’amaraso n’ububabare bwo mu gatuza maze bagasanga utera ubushake.

Ubushakashatsi bwakozwe na Dr. Louis Anderson, inzobere mu by’imiti, wo mu kigo cya ‘urology care foundation’ cyo muri Leta zunze ubumwe za Amerika, bugaragaza ko hari abagabo n’abasore bayikoresha kandi mu by’ukuri batayikeneye, bikaba byabagiraho ingaruka zikomeye.

Uretse kuba uwufashe ashobora kurwara umutwe, indwara y’umutima, gucibwamo, umugongo, kubura ibitotsi, ikirungurira n’ibindi, viagra ishobora gutera ubugumba no kubura ubushake burundu.

Dr. Anderson agira inama abagabo gusaba uruhushya muganga kugira ngo babashe gukoresha uwo muti, cyane ko abawucuruza bo baba bashaka inyungu zabo bwite.

Anagira inama abagabo kuri bimwe mu biribwa bafata bikabongerera ubwo bushake, birimo water melon, inyama, ubunyobwa, indimu, divayi itukura, icyayi, shokola n’icyayi, maze bagakora n’imyitozo ngororamubiri bakirinda n’umubyibuho.

Ibi kandi biravugwa mu gihe abagabo barenga miliyoni 100 ku isi bari hagati y’imyaka 40 na 70, bafite ikibazo cyo kutagira ubushake bwo gukora imibonano mpuzabitsina.

Raporo y’Ishami ry’Umuryango w’Abibumbye ryita ku Buzima (OMS) yashyizwe ahagaragara mu 1998, yavugaga ko abagabo bari mu kigero cy’imyaka 65 bagera hafi ku 140 bahitanywe na viagra.

MENYA UMWANDITSI

Caissy Nakure Christine

Umunyamakuru wa Kigali Today/KT Radio

@ Nakurecaissy

Reba inkuru zose nanditse ( 174 )