Kubera ubwinshi bw’abantu bavomera muri ako gasantere, hari igihe amazi ashira bamwe bagataha batayabonye. Iyo bayabuze bajya ahitwa Rubirizi aho bajya kuyavoma mu kabande bagakoresha amasaha agera kuri abiri; nk’uko bisobanurwa na Nikuze Odette utuye mu kagari ka Ruhanga mu murenge wa Kigina.

Aho mu gasantere ka Nyakarambi ijerekani y’amazi igura amafaranga 40. Hari robine enye imwe niyo isigaye ikora gusa; nk’uko bivugwa na Kamirindi ucuruza amazi kuri robine iri Nyakarambi.

Mu karere ka Kirehe, amazi amaze kugera ku baturage ku kigero cya 39,3% hakaba hari gahunda yo gusana imiyoboro yangiritse ku buryo mu minsi ya vuba amazi azaba yabonetse; nk’uko byemezwa n’umukozi ushinzwe ibidukikije n’amazi mu karere ka Kirehe, Syvais Mutabaruka.

Ubu akarere katanze isoko ryo gusana gusana umuyoboro wa Kamusare mu murenge wa Nyarubuye uzaha amazi umurenge wa Nyarubuye wose. Mu mwaka wa 2015 bateganya kuzaba bageze kuri 85% by’amazi azaba ari mu karere kose.

Ikibazo cy’amazi kigarara ku bigo by’amashuri, amavuriro hamwe n’abaturage kuko amazi aba ari make ugereranije n’akenewe.

Hari hashize iminsi mu karere ka Kirehe hanavugwa ikibazo cy’umuriro ariko cyo ubu cyarakemutse.

Grégoire Kagenzi