Urukingo rw’igituntu ‘BCG’ rurifashishwa mu gushaka umuti wa COVID-19

Muri Gashyantare na Werurwe 2020, mu Burayi Covid-19 yari ikajije umurego, ariko ibihugu birimo abaturage bakingiwe igituntu ntibarembye cyane nk’uko abashakashatsi babivuga.

Urukingo rw’igituntu rwitwa Bacillus Calmette–Guerin (BCG) rukoreshwa ku isi hose. Buri mwaka ruterwa abana barenga miliyoni 130, mu bihugu igituntu kikiri indwara igaragara mu baturage.

Mu myaka myinshi uru rukingo rwagiye rugaragara ko rurinda abana ibirenze igituntu nk’uko bigaragazwa n’abashakashatsi bandika muri Nature journal.

Nubwo igituntu giterwa na bacteria, ubushakashatsi bwakozwe ku bantu bwerekanye ko urukingo rwa BCG rurinda umubiri na virusi cyane cyane izibasira umuhogo n’ibihaha.

Urubuga rwandika iby’ubuvuziThe Lancet, ruvuga ko ubu bwirinzi buturuka ku mpinduka umubiri ugira biturutse kuri uru rukingo umubiri ukitoza kurwanya n’izindi ndwara. Ni ukuvuga ko umuntu wakingiwe na BCG ashobora kurwanya ibirenze igituntu.

Gasherebuka Jean Bosco umukozi w’ishami rw’Umuryango w’Abibumbye ryita ku buzima (OMS)avuga ko kugeza ubu nta cyerekana ko urwo rukingo rw’igituntu rurwanya covid-19, ndetse ko ubushakashatsi bwinshi buri gukorwa n’amatsinda atandukanye ariko ko nta kiremezwa”.

Impuguke Pregrag Kon mu ndwara z’ibyorezo muri Serbia, aganira n’itangazamakuru yavuze ko abantu batewe urukingo rwa BCG batarembejwe na Covid-19.”

Kuba abarwayi ba Covid-19 batarembye mu bihugu bitandukanye ndetse no mu Rwanda harimo no kuba harafashwe ingamba zo kurwanya iki cyorezo hakiri kare harimo gahunda yo kuguma mu rugo, gufunga imipaka no gushyira mu kato abarwayi babonetse.

Shakisha izindi nkuru
kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka