U Rwanda rwasinye amasezerano y’ubufatanye n’ikigo cy’ubuvuzi cyo mu gihugu cya Mauritius (Aegle Onco Care Center Ltd), kugira ngo ubu buvuzi bushyirwe mu bikorwa mu Rwanda.

Ibikorwa by’ubu buvuzi bizashyirwa mu Kigo cy’Igihugu gishinzwe kuvura no kwita ku barwayi ba kanseri (National Cancer Center in Butaro), giherereye mu Murenge wa Butaro mu Karere ka Burera.

Ni ubuvuzi bwifashisha imashini igezweho izwi nka PET (Positron Emission Tomography).

Iyi mashini ifasha umurwayi ufite indwara itagaragariye mu mashini zisanzwe, aho bamutera utunyabutabire duke dukomoka ku ngufu za nucléaire, hanyuma bakamunyuza mu cyuma cyabugenewe.

Utwo tunyabutabire tujya ahari ya ndwara itaragaragara, tugafasha mu kuyitahura. Bikora ku ndwara nk’iz’umutima, kanseri, iz’ubwonko, imyakura n’izindi.

Ubuvuzi bwifashisha ingufu za Nikeleyeri, ni igice cy’ubuvuzi kibarizwa mu ishami rijyanye n’ibikoresho bireba mu mubiri w’umuntu, ariko ugasanga ahenshi kitahaba kuko imashini zacyo ziba zihenze.

Mu buvuzi bwifashisha izo ngufu, haba imashini ebyiri zifashishwa zirimo izwi nka ‘Single Photon Emission Computed Tomography (SPECT) n’indi izwi nka ‘Positron Emission Tomography, PET, ari na yo izajya ikoreshwa mu Rwanda.

Iyo umurwayi agiye kubagwa hifashishijwe iyo mashini, cyangwa agiye guhabwa ubundi buvuzi, umuganga aba abona icyo avura, bitandukanye n’uko wasatura umuntu ugiye gushaka indwara utazi ingano y’igice irimo.

Ni ubuvuzi bwifashishwa mu kwita ku bice bikomeye nko kuvura kanseri yo mu bwonko, imwe ushobora kwibeshya gato ugahungabanya ubwonko bwose.

U Rwanda rusanzwe rufite imashini nka X-Rays, Ultra Sound, MRI, CT scan, Endoscopic Ultrasound’, Multix Impact E, Ultrasound, Somatop go, Top n’izindi zitari zihari mu myaka ishize.

Ubu buryo bushya buzafasha mu kugabanya ingendo zakorwaga n’abarwayi bajyaga gushakira serivisi nk’izi mu bihugu byo hanze, bukazazamura urwego rw’ubuvuzi bw’indwara za kanseri n’izindi zikomeye mu gihugu.

Ibijyanye n’ubu buvuzi, ni kimwe mu byemezo byaraye bifatiwe mu Nama y’Abaminisitiri yateranye ku mugoroba wo ku wa Gatanu tariki 28 Ugushyingo 2025, iyobowe na Perezida wa Repubulika Paul Kagame.