Ibi bikoresho byose bifite agaciro ka Miriyoni zisaga 32 z’amafaranga y’u Rwanda, babitewemo inkunga n’abagiraneza bo mu gihugu cy’u Butaliyani bagize ishyirahamwe rya Rotary Club.

Bizimana Innocent utuye muri uyu murenge avuga ko mbere yo kubona icyo kigo nderabuzima bakoraga urugendo rw’amasaha ari hagati y’abiri n’ane bajya kwivuriza mu yindi mirenge bahana imbibe.

iki kigo cyatangiye gifite ibibazo bikomeye birimo kuba ntamashanyarazi bafite, inyubako nkeya zituma bavanga ababyeyi n’abandi barwayi, ariko kuri ubu bishimira ko bimwe muri ibyo bibazo biri kugenda bibonerwa igisubizo, nk’uko uyu muturage akomeza abitangaza.

Umuyobozi w’ikigo nderabuzima cya Rwinzuki Ndizeye Joseph Desire avuga ko iyo mbangukira gutabara ije kubafasha gutanga serivisi nziza kubarwayi, kuko baburaga uko bageza abarembye kubitaro byisumbuyeho bikaba byatuma barembera aho bari.

Umunyamabanga nshingwa bikorwa w’umurenge wa Nzahaha Nyirangendahimana Mathilde yavuze ko ije gufasha abaturage byihuse kugera kuri serivisi z’ubuvuzi, kuko hari ababyeyi bafatwaga n’inda bakabura ikibageza ku kigo nderabuzima.

Abajyanama b’ubuzima nabo bashimiye ibikoresho batewemo inkunga kukigo nderabuzima babarizwamo aha bagasaba ko Leta yabafasha kubona ibindi bakibura birimo amashanyarazi, umuhanda n’izindi nyubako kuko izo bafite zidahagije.

Musabwa Euphrem