Perezida Magufuli agiye gutumiza umuti bivugwa ko uvura COVID-19 muri Madagascar

Yanditswe na

KT Editorial

3-05-2020 - 15:28' | Ibitekerezo ( )

Perezida wa Tanzania John Magufuli, kuri iki yumweru yavuze ko ari guteganya kohereza indege muri Madagascar gufatayo umuti wo mu byatsi, Perezida wa Madagascar aherutse kuvuga ko waba “urinda ukanavura” COVID-19.


Perezida Magufuli agiye gutumiza umuti bivugwa ko uvura COVID-19 muri Madagascar (Photo:BBC)

BBC yavuze ko abayobozi muri Tanzania bakomeje kunengwa ko basuzuguye icyorezo cya COVID-19, ndetse ntibafate ingamba zikomeye zo kubuza abantu kwegerana.

Perezida Magufuli yabivugiye mu muhango wo kurahiza Minisitiri mushya w’Ubucamanza n’Itegekonshinga, wasimbuye Augustine Philip Mahiga uherutse kwitaba Imana kuwa Gatanu w’iki cyumweru.

Perezida Magufuli yavuze ko yamaze kubivuganaho na Leta ya Madagascar, ko ndetse agiye kohereza indege kuri icyo kirwa ngo ijye gufatayo uwo muti.

Yagize ati “Ndi kuvugana na Madagascar ndetse bamaze kwandika ibaruwa bavuga ko hari umuti bavumbuye. Tuzoherezayo indege izane uwo muti, kugira ngo n’Abanyatanzania na bo bashobore kubyungukiramo. Rero twe nka Leta, turi kubikoraho amanywa n’ijoro”.

Nubwo Madagascar yavuze ko uwo muti waba "uvura kandi ukarinda" icyorezo cya COVID-19, Ishami ry’Umuryango w’Abibumbye ryita ku Buzima (OMS), ryo ntirirawemera nk’umuti w’iyi ndwara, ndetse rivuga ko nta muti cyangwa urukingo byayo biraboneka.