Kuri uyu wa gatatu tariki 26/6/2013, Perezida Kagame yakiriye itsinda ry’impuguke 27 mu by’ubuvuzi zo muri Mercy Hospital, bayobowe na Dr Mike O’neal, bakazakora ubushakashatsi mu bitaro bya Gisirikare biri i Kanombe, ibya Polisi biri ku Kacyiru, ibya Muhima ndetse n’ibya Kibagabaga, byose biri mu mujyi wa Kigali.

Hazasuzumwa uburyo ubushobozi bw’abakozi butera imbere, ibikorwaremezo mu by’ubuvuzi bihari, ibikoresho by’ubuvuzi bikoreshwa mu bitaro, ubushakashatsi bukorwa, ikoranabuhanga mu kwita ku barwayi no kubika inyandiko, kwita ku ndembe cyane cyane izangiritse mu bwonko, ndetse n’imicungire inoze y’ibitaro.

“Nyuma y’iyi nyigo tuzatangaza raporo igaragaza imbaraga zihari mu kwita ku buzima bw’abarwayi, ndetse n’ibikwiye kwitabwaho hamwe n’ubufasha tugomba gutanga, kuko dufite abahanga batandukanye bashobora gutuma abaturage b’abanyarwanda bagira ubuzima bwiza”, Jim R. Gebhart uyoboye Mercy Hospital, niko yatangaje.

Ministiri w’ubizima, Dr Agnes Binagwaho, yashimye impuguke z’ibitaro bya Mercy, akaba yijeje ko bazahabwa amakuru yose bakeneye, nyuma hakazabaho ibiganiro bigamije kungurana inama ku byiciro by’ubuzima bizahabwa inkunga n’ibyo bitaro.

Iryo tsinda ry’impuguke zivuye muri Leta ya Oklahoma y’igihugu cya USA, riri mu Rwanda kuva tariki 23/06-05/07/2013, rikaba ryizeza ko rizakomeza ubufatanye n’u Rwanda, mu guteza imbere ubuzima n’uburezi.

Simon Kamuzinzi