OMS yiyemeje gufatanya n’u Rwanda gukumira icyorezo cya Marburg

Yanditswe na

Ernestine Musanabera

28-09-2024 - 20:47' | Ibitekerezo ( 2 )

Ishami ry’Umuryango w’Abibumbye ryita ku Buzima (OMS) ryatangaje ko rigiye gufatanya n’u Rwanda gukumira ikwirakwira ry’icyorezo cya Marburg.

Virusi ya Marburg uko igaragara mu byuma by'ikoranabuhanga

Umuyobozi w’Ishami ry’Umuryango w’Abibumbye ryita ku Buzima (OMS), Dr. Tedros Adhanom Ghebreyesus, yavuze ko OMS izatanga inkunga ku Rwanda kandi izafatanya na Guverinoma y’u Rwanda guhagarika ikwirakwira rya virusi no kurinda abantu kwandura iki cyorezo.

Ati "Minisiteri y’Ubuzima yatangaje ko hari abarwayi ba Marburg. OMS izakomeza kongera ubufasha ndetse ikorane na Guverinoma y’u Rwanda mu guhagarika ikwirakwira ry’iyi virusi mu kurinda abaturage bari mu byago."

OMS ivuga ko uwanduye iyi ndwara aba ashobora kugaragaza ibimenyetso mu gihe kiri hagati y’iminsi 2 na 21.

Ishami ry’Umuryango w’Abibumbye ryita ku Buzima rivuga ko iyi ndwara ari mbi cyane kuko ishobora kwica ku kigero cya 88% abayirwaye. Iyi ndwara ntigira umuti wagenewe kuyivura cyangwa urukingo, mu kuyivura ngo havurwa ibimenyetso hifashishijwe imiti itandukanye.

Minisiteri y’Ubuzima irakangurira abantu bose kugira isuku bagakomeza umuco wo gukaraba intoki, ariko ugaragaje ibimenyetso akihutira kujya kwa muganga.

Minisiteri y’Ubuzima yavuze ko ibimenyetso by’iyo ndwara ari umuriro mwinshi, kuribwa umutwe bikabije, kuribwa mu mitsi, kuribwa mu nda no kuruka, gusa iyo iyi ndwara yazahaje umurwayi ashobora kuva amaraso ahantu hanyuranye nko mu maso n’ahandi, ndetse hakaba n’abayitiranya na Ebola.

Iyi ndwara basanze yaraje iturutse mu nkende zinjijwe mu Budage bavuga ko zivuye muri Uganda. Ariko kuva icyo gihe iyi virusi yagiye ica no mu zindi nyamaswa, ikwira no mu bindi bihugu.

Amakuru yatangajwe na OMS avuga ko iyi ndwara imaze kugaragara mu bihugu bitandukanye. Mu mwaka wa 2012 abantu 15 muri Uganda barayanduye, muri bo bane barapfuye. Mu mwaka wa 2017 abantu batatu ni bo bayanduye irabahitana, mu mwaka wa 2005 mu gihugu cya Angola abantu 374 barayanduye, 329 irabahitana, mu mwaka wa 1998 na 2000 muri Repubulika Iharanira Demokarasi ya Congo (DR Congo) abantu 154 barayanduye, 128 irabahitana. Mu mwaka wa 1967 mu Budage abantu 29 baranduye, barindwi muri bo irabahitana.