KT TV
Mu Rwanda hagiye gutangwa Doze ya kabiri ishimangira y’urukingo rwa Covid-19
Minisiteri y’Ubuzima yatangaje ko u Rwanda rugiye gutanga doze y’urukingo rwa kabiri rushimangira mu rwego rwo gukomeza guhangana n’indwara ya Covid-19.
Minisiteri y’Ubuzima ibinyujije kuri Twitter, yavuze ko guhera tariki 08 Kanama 2022 iyi doze izatangira gutangwa kuri site zose z’ikingira hibandwa ku bakuze bari hejuru y’imyaka 60 n’abandi bafite intege nke z’umubiri.
Abanyarwanda barakangurirwa gufata Doze y’urukingo rwa 2 rushimangira kugira ngo bahashye icyorezo cya covid-19 bikingiza byuzuye.
Umunyamabanga wa Leta muri Minisiteri y’Ubuzima, Lt. Col. Dr. Tharcisse Mpunga, yasobanuye ko impamvu yo gutanga iyi doze ya kabiri ishimangira y’urukingo rwa COVID-19 ari ukubera ko virusi ya COVID-19 igenda ihindagurika, kandi inkingo zifashishwa zikaba zarakozwe hagendewe ku bwoko bwa virusi yari iriho icyorezo kicyaduka.
Icyorezo cya Covid-19 biragaragara ko kitaracika kuko Minisiteri y’Ubuzima (MINISANTE) itangaza buri munsi imibare y’abanduye ikanashishikariza abantu gukomeza ingamba zo kucyirinda no guhabwa inkingo ku buryo bwuzuye.
Imibare itangwa na Minisiteri y’Ubuzima igaragaza ko abamaze kwitaba Imana mu Rwanda bazize Covid-19 ari abantu 1,466.
Ibitekerezo
Ohereza igitekerezo
|
|
