MINISANTE yamaganye abacyamamaza ibikorwa by’ubuzima

Minisitiri w’Ubuzima Dr Diane Gashumba aramagana abakora ibikorwa by’ubuvuzi babyamamaza mu itangazamakuru kuko bitemewe n’amahame ya kiganga.

JPEG - 148.6 kb
Minisitiri Dr Gashumba avuga ko abamamaza ibikorwa by’ubuvuzi batagira ubunyamwuga

Minisitiri Dr Gashumba yabivuze kuri uyu wa Kane, ubwo yari yitabiriye ikiganiro kivuga uko urwego rw’ubuzima ruhagaze mu Rwanda, ibibazo birimo n’uko byakemuka, kikaba cyarateguwe n’Umuryango w’abanyamakuru baharanira amahoro (Pax Press).

Icyo kiganiro cyitabiriwe n’abayobozi mu nzego zitandukanye zaba iza Leta no muri Sosiyete sivile zo hirya no hino mu gihugu, ahanini bafite aho bahurira n’ibikorwa bijyanye n’ubuzima ndetse n’abanyamakuru bo mu bitangazamakuru bitandukanye.

Minisitiri Dr Gashumba avuga ko bitemewe nta n’ahandi biba kwamamaza ibikorwa by’ubuvuzi kuko ngo bihabanye cyane n’amahame y’uwo mwuga.

Yagizea ati “Kirazira nta muganga wamamaza, muzarebe ibitaro bikomeye mu gihugu ntuzuumva aho byamamaza, ababikora nta bunyamwuga bafite kuko bitemewe mu mahamwe y’ikiganga. Umuntu akajya kuri televiziyo y’igihugu akavuga ngo avura inyatsi, ubukene, ababuze abagabo n’ibindi, ntibibaho”.

JPEG - 185.8 kb
Ibiganiro byose byibanze ku buzima hagamijwe kureba uko ibibazo biri muri urwo rwego byakemuka

Arogera ati “Mudufashe uko kwamamaza guhagarare kuko ari ukuyobya Abanyarwanda. Ntibyumvikana ukuntu umuntu aza agatanga ikiganiro kijyanye no kuvura umwijima ntaho yabyize, mujye musaba Minisiteri y’Ubuzima ibahe ababyize batange ibiganiro”.

Yakomeje avuga ko akenshi abo bavuzi bamamaza ibyo bakora usanga nta n’ibyangombwa bagira bibemerera gukora uwo mwuga ari yo mpamvu byamaganwa.

Muri icyo kiganiro kandi hagarutswe ku kibazo cy’abaganga b’inzobere bo mu bitaro bya Leta batanga gahunda ya kure cyane ku bavurwa ariko wabasanga ahandi bakwakira, ngo ni umuco mubi nk’uko Misitiri Dr Gashumba yabivuze.

Ati “Ikibazo cy’inzobere nke turacyagifite mu bitaro n’amavuriro, umuganga w’inzobere kwiga bimufata nibura imyaka 11 kandi muzi ko hari n’abo twabuze muri Jenoside. Ibyo ariko ntibyatuma umuganga atakira umurwayi akamwohereza ahandi, ni imikorere mibi yo kwamaganwa kandi iyo tubimenye turabahana”.

JPEG - 319.5 kb
Ibiganiro byitabiriwe n’abaturutse mu nzego zitandukanye

Umuhuzabikorwa wa Pax Press, Albert Baudouin Twizeyimana, yemeza ko ibiganiro bihurije inzego zitandukanye ku kibazo runaka ari inzira yo kugikemura.

Ati “Kuba twahuye ari inzego za Leta, sosiyete sivile n’abanyamakuru tuvuga ku kibazo cy’ubuzima, bituma buri rwego rwikebuka rugafata umwanzuro wo kugira ibikosorwa cyangwa ibishyigikirwa hagamijwe imibereho myiza y’umuturage”.

Yongeraho ko ibyo biganiro biba bishingiye ku byifuzo n’ibitekerezo by’abaturage kuko abanyamakuru b’uyo muryango baba baragiye hirya no hino mu gihugu, bakaganira n’abaturage bakumva uko babayeho.

JPEG - 319.5 kb
Ibiganiro byitabiriwe n’abaturutse mu nzego zitandukanye
PROMOTED STORIES

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka